काठमाडौं (हाम्रो खेलकुद) – विश्व कप छनोटको पहिलो खेलका लागि राष्ट्रिय फुटबल टोली आइतबार कुवेत प्रस्थान गरेको छ । नेपाल र कुवेतबीच भदौ १९ गते खेल हुँदैछ । टोलीलाई एन्फाले औपचारिक विदाई शुक्रबार नै गरेको थियो ।

पहिलो खेलको तयारीका लागि टोलीले मलेसिया भ्रमण गरेको थियो । मलेसियाको लिग च्याम्पियन टोलीसँगको मैत्रीपूर्ण खेल नेपाली टोलीले १–० ले गुमाएको थियो । त्यो खेलको कप्तान सुजल श्रेष्ठले गरेका थिए ।

नियमित कप्तान विराज महर्जन, सिनियर खेलाडी भरत खवास र गोलकिपर किरण चेम्जोङ टोलीमा नहुँदा सुजलले मैत्रीपूर्ण खेलमा सुजलले कप्तानी गर्ने मौका पाएका थिए । कुवेतका लागि विराज टोलीमा छैनन् । विराज नहुँदा राष्ट्रिय फुटबल टोलीको कप्तान को हुने अझै निश्चित भइसकेको छैन ।

प्रशिक्षक कालीनले कप्तानको जिम्मेवारी टुंगो नलागेको र त्यसलाई ठूलो विषय बनाउन नपर्ने बताएका थिए । यद्दपी झन्डा ग्रहण गर्ने क्रममा भने उपकप्तान किरण मञ्चमा गएका थिए । कालिनले सबै २३ खेलाडी नै आफ्नो लागि कप्तान सरह रहेको बताएका थिए । विश्व कप छनोटमा नेपाल, कुवेतसहित अस्ट्रेलिया, जोर्डन र चाइनिज ताइपे रहेका छन् ।

नेपाली फुटबल टोली

गोलकिपर – किरण चेम्जोङ (कप्तान), विकेश कुथु, विशाल श्रेष्ठ
डिफेन्डस – सरोज दाहाल, अजित भण्डारी, दीनेश राजवंशी, अनन्त तामाङ, देवेन्द्र तामाङ, रजिन धिमाल, सुमन अर्याल
मिडफिल्ड – रोहित चन्द, सुनिल बल, रवि पासवान, अन्जन विष्ट, सुजल श्रेष्ठ, हेमन गुरुङ, विक्रम लामा, तेज तामाङ, सन्तोष तामाङ, विशाल राई
फरवार्ड – विमल घर्तीमगर, अभिषेक रिजाल, नवयुग श्रेष्ठ