काठमाडौं (हाम्रो खेलकुद) – नादेझ्दा कप अन्तर्गत समूह चरणको दोस्रो खेलमा नेपाल र उज्बेकिस्तान भिडिरहेका छन् । पहिलो हाफको खेल सकिंदा नेपाल १-० ले पछाडी रहेको छ ।

निकै प्रतिस्पर्धात्मक खेलमा नेपालले खेलको ३४ औं मिनेटमा गोल खाएको हो । उज्बेकिस्तानको डिफेन्डरले दिएको लामो पासलाई नेपाली डिफेन्सले रोक्न नसक्दा उज्बेकिस्तानकी फरवार्डले गोल गर्दै अग्रता लिन सफल भइन् । उनको पहिलो प्रहार गोलरक्षक एन्जिला तुम्बापो सुब्बाले वन भर्सेस वन स्थितिमा बचाएपनि रिबाउन्डमा आएको प्रहार खाली पोस्टमा गोल भएको थियो ।

नेपालले खेलको १४ औं मिनेटमा नै कप्तान निरु थापालाई गुमाएको थियो । मिडफिल्डमा बलका लागि जुध्ने क्रममा विपक्षी खेलाडीसँग ठोकीपछि उनलाई चोट लागेको थियो । स्ट्रेचरमा मैदानबाहिर लगेपछि उनको स्थानमा सरु लिम्बू मैदान प्रवेश गरेकी हुन् । टोलीको कप्तानी मिडफिल्डर रेनुका नगरकोटेले सम्हालेकी छिन् । इन्ज्युरी समयको तेस्रो मिनेटमा उज्बेकिस्तानकी खेलाडीको प्रहार क्रसबारमा लगेर फर्कंदा नेपाल भाग्यमानी भएको थियो ।

यस खेलमा जित हात पार्ने टोली अंक तालिकाको शीर्षस्थानमा उक्लँदै फाइनल पुग्ने सम्भावना बलियो हुनेछ । आजै हुने दोस्रो खेलमा आयोजक किर्गिस्तान र ताजिकिस्तानले प्रतिस्पर्धा गर्नेछन् ।