काठमाडौं (हाम्रो खेलकुद) – नेपाली राष्ट्रिय फुटबल टोलीले विश्वकप छनोटको दोस्रो चरणको दोस्रो खेलमा चाइनिज ताइपेइको सामना गर्दैछ । कुवेतविरुद्ध पहिलो खेलबाट प्रशिक्षक योहान कालिनले तीन खेलाडी परिवर्तन गरेका छन् ।

अघिल्लो खेलमा चोट बोकेका डिफेन्डर अजित भण्डारीको स्थानमा दिनेश राजवंशी टोलीमा आएका छन् । सुमन अर्यालको स्थानमा रजिन धिमाल पहिलो रोजाईमा परेका छन् । मिडफिल्डर विक्रम लामाको स्थानमा अन्जन विष्ट टोलीमा समेटिएका छन् । प्रशिक्षक कालिनले यस खेलमा केहि आक्रामक रणनीति लिने देखिएको छ । रोहित चन्दले सम्भवत: रक्षात्मक भूमिका निर्वाह गर्नेछन् ।

पहिलो खेलमा ७-० ले पराजित नेपाल ताइपेइविरुद्ध सुखद नतिजा आत्मसात गर्न चाहन्छ । प्रशिक्षक कालिन र कप्तान किरणले पूर्वसन्ध्यामा आयोजित पत्रकार सम्मेलनमा टोली तयार रहेको बताएका थिए । नेपालसँगै समूहमा जोर्डन, कुवेत, अष्ट्रेलिया र ताइपेइ रहेका छन् । ताइपेइले पहिलो खेलमा जोर्डनसँग २-१ को हार बेहोरेको थियो । नेपाली टोली आइतबार ताइपेइ पुगेको थियो ।

नेपालको सुरुवाती ११ : किरण चेम्जोङ, दिनेश राजवंशी, अनन्त तामाङ, देवेन्द्र तामाङ, रजिन धिमाल, विशाल राई, रोहित चन्द, अन्जन विष्ट, रवी पासवान, सुजल श्रेष्ठ, विमल घर्तीमगर