एजेन्सी – नेपाली राष्ट्रिय फुटबल टोली सन् २०२२ को फिफा विश्वकप छनोट अन्तर्गत दोस्रो चरणको दोस्रो खेल खेलेर स्वदेश फर्किएको छ ।

नेपाली टोली बुधबार राति विमानस्थल अवतरण गरेको हो । टोलीलाई राष्ट्रिय खेलकुद परिषदका सदस्य सचिव रमेशकुमार सिलवाल, एन्फा अध्यक्ष कर्माछिरिङ शेर्पा, वरिष्ट उपाध्यक्ष पंकजविक्रम नेम्वाङ लगायतका पदाधिकारीले स्वागत गरेका थिए । नेपाली टोलीसँग मिडफिल्डर रोहित चन्द भने स्वदेश फर्किएनन् । उनी व्यवसायिक क्लब फुटबल खेल्न आफ्नो क्लब जकार्ता पुगेका छन् ।

मंगलबार ताइवानमा सम्पन्न खेलमा नेपालले चाइनिज ताइपेइलाई २-० ले पराजित गरेको थियो । नेपालको जितमा दुवै गोल अन्जन विष्टले गरेका थिए । पहिलो हाफको तेस्रो मिनेटमा सुजल श्रेष्ठको फ्रिकिकमा हेडरमार्फत गोल गर्दै उनले सुरुवाती अग्रता दिलाएका थिए । त्यसपछि दोस्रो हाफको ६२ औं मिनेटमा उनले सुजलकै पासमा सानदार गोल गरेका थिए ।

नेपालले त्यसअघि पहिलो खेलमा कुवेतसँग ७-० को हार बेहोरेको थियो । समूहको अन्य खेलमा जोर्डनले चाइनिज ताइपेइलाई २-१ ले हराएको थियो । मंगलबार सम्पन्न दोस्रो खेलमा अष्ट्रेलियाले कुवेतमाथि ३-० को सहज जित दर्ता गरेको थियो । अंक तालिकामा नेपालसहित ४ टोलीको ३-३ अंक रहेको छ । दुवै खेलमा हार बेहोरेको ताइपेइ अंकविहिन रहेको छ ।

नेपालले अक्टोबर १० मा अष्ट्रेलियासँग क्यानबेरास्थित जिओ रंगशालामा खेल्नेछ । त्यसपछि अक्टोबर १५ मा जोर्डनसँग खेलेपछि नेपालको अवे खेल सकिनेछ । समयमा नै दशरथ रंगशाला तयार भएको अवस्थामा नेपालले बाँकी चारै खेल घरेलु मैदानमा खेल्नेछ ।