नेपालगन्ज (हाम्रा खेलकुद) – बाँकेको पश्चिम क्षेत्रमा अर्को महिना हुन लागेको योगिनी कप फुटबल प्रतियोगितालाई नेपाल आईस वियरले मुख्य प्रायोजन गरेको छ । नेपालगन्जमा बिहीबार भएको पत्रकार सम्मेलनमा सिजी ब्रुअरी (नेपाल) प्राली र आयोजक सहयोग आवाज नेपालले सम्झौता पत्रमा हस्ताक्षर गरे ।

प्रतियोगिता संयोजक तरिन्द्र बहादुर थापा र सिजी ब्रुअरी(नेपाल) प्रालीका म्यानेजर उमेश निरौलाले सम्झौता पत्रमा हस्ताक्षर गरे । सम्झौता पश्चात प्रतियोगिताको नाम नेपाल आइस योगिनी कप फुटबल प्रतियोगिता रहेको छ । प्रतियोगिता असोज ३ गतेदेखि ७ गते सम्म सञ्चालन हुनेछ ।

म्यानेजर निरौलाले सिजी ब्रुअरी खेलकुदको विकासका लागि सधै अग्रसर भएर लागेको बताए । नेपालका विभिन्न स्थानमा भैरहेको फुटबल प्रतियोगितामा सिजीले प्रायोजन गर्दै आएको बताउँदै निरौलाले भने, ‘सिजी फुटबलको विकासमा सधै सहयोग गर्न तयार छ । हामीले देशका विभिन्न खेलकुद प्रतियोगिता र सामाजिक कार्य गर्दै आएको छौं । आज बाँकेको खेलकुदमा उर्वर मानिएको क्षेत्रमा हुन लागेको प्रतियोगितामा प्रायोजन गर्न पाउँदा खुसी छौं । यसले प्रतियोगिताको स्तर बढनुका साथै खेलाडीले अवसर पाउनेछन भन्ने विश्वास लिएको छौं ।’

खजुरा–२ गौघाट स्थित योगिनी उच्च माविको खेल मैदानमा प्रतियोगिता हुदैछ । प्रतियोगितालाई खजुरावासी र विदेशमा रहेका युवाहरुले सहयोग गरिरहेको प्रतियोगिता संयोजक थापाले जनाए । थापाले भन्नु भयो, ‘ नेपाल आइससँग प्रतियोगिताको मुख्य प्रायोजन बारे सार्वजनिक गर्न पाउँदा हामीले खुसी महशुस गरिरहेको छौ । नेपाल आइससँगको सम्झौता पछि प्रतियोगिताले थप उचाइ हासिल गर्ने विश्वास लिएका छौं ।’

यसैगरी प्रतियोगितामा सहभागी हुने योगिनी माविको ‘ए’ टिमलाई म्यानेजर उमेश निरौलाले जर्सी प्रायोजन गरेका छन् । योगिनीको ‘बी’ टिमलाई निर्देशक, समाजसेवी, कलाकार खजुरा गाउँपालिका निवासी शेखर खनालले जर्सी र खेलकुद सामाग्री प्रायोजन गरेका छन ।
बिहिबार भएको पत्रकार सम्मेलनमा अखिल नेपाल फुटबल संघका सदस्य एवम प्रशिक्षक सानु तामाङले योगिनी कप फुटबलले करियर बनाउन चाहने युवाहरुका लागि थप हौसला प्रदान गरेको बताए ।

बाँके जिल्ला फुटबल संघको प्राविधिक सहयोगमा गर्न लागिएको यस प्रतियोगितामा बाँके र बर्दियाका गरी ८ वटा फुटबल क्लबले प्रतिस्पर्धा गर्नेछन । अनुमानित ३ लाख ५० हजार बजेट रहेको प्रतियोगिताको विजेताले ५० हजार , दोस्रो हुनेले २५ हजार रुपैयाँ प्राप्त गर्नेछ । प्रतियोगिताको उत्कृष्ट खेलाडीलाई १० हजार, विधागत रुपमा उत्कृष्ट गोलकिपर, फरवार्ड, मिडफिल्डर, डिफेन्स र प्रशिक्षक जनही ५ हजार प्रदान गर्ने प्रतियोगिता संयोजक थापाले जनाए ।