काठमाडौं (हाम्रो खेलकुद)– दुई साता अघि साफ यू १५ च्याम्पियनसिपमा दोस्रो भएको नेपाली टोलीले शनिबार एएफसी यू १६ च्याम्पियनसिपको यात्रा सुरु गर्दैछ । बलियो जोर्डनविरुद्ध खेल्दै नेपालले च्याम्पियनसिपको यात्रा थाल्नेछ । बोन टेस्टबाट कप्तान प्रदीप लम्सालसहित टोलीका तीन प्रमुख खेलाडी बाहिरिदै नेपाली टोली पहिलाको तुलनामा कमजोर मानिएको छ ।

प्रदीपको नेतृत्वमा नेपाली युवा टोली भदौ १४ गते साफ यू १५ च्याम्पियनसिपको फाइनलमा पराजित भएको थियो । यू १६ को छनोटको तयारी रहँदाको अवस्थामा एमआरआईबाट गरिएको हड्डी परिक्षणमा प्रदीपसँगै असिम राई र इश्वर गुरुङ असफल भएपछि नेपाललाई झड्का लागेको थियो ।

एमआरआईबाट तीनै खेलाडी बढी उमेरको भएको रिपोर्ट आएको थियो । प्रदीप जान ताम्लीलाई टोलीको कप्तान बनाइएको छ । जान टोली पहिला भन्दा कमजोर भएको स्वीकार्छन् तर पनि शतप्रतिशत दिएर खेल्ने बताएका छन् । ‘तीन जना प्रमुख खेलाडी नहँदा टिममा असर त परेको छ नै तर अब हामीले यहाँ हुने खेलहरुको बिषयमा सोच्नुपर्छ , ‘जानले भने, ‘सबै टिमहरु राम्रा छन् र छनोट हुनका लागि हामीले आफ्नो शतप्रतिशत दिनुपर्नेछ । त्यसको लागि हामी तयार छौं । हामी राम्रो फुटबल खेल्न चाहन्छौं ।’

नेपालको लागि २०२० मा हुने एएफसी यू १६ च्याम्पियनसिपको अन्तिम चरणमा छनोट हुन कुनै हालमा सहज छैन । समूह ए मै दुई अरु बलिया राष्ट्र कुवेत र ताजकिस्तान रहेका छन् भने अर्को दक्षिण एसियाली छिमेकी टोली श्रीलंका छ । साफमा नेपालसँग २–० ले पराजय बेहोरेको श्रीलंकाले पनि यू १६ का लागि ५ खेलाडी परिवर्तन गरेको छ ।

छनोटबाट समूह विजेता र ९ समूह मध्येबाट दोश्रो स्थानमा छनोट प्रतियोगिता अन्त्य गर्ने मध्ये उत्कृष्ट चार टोलीले अर्को वर्ष अन्तिम राउन्ड खेल्न पाउनेछ । अम्मानको जार्का सिटीस्थित प्रिन्स मोहम्मद अन्तर्राष्ट्रिय रंगशालामा हुने पहिलो खेलमा धेरै चुनौति सामना गर्नुपर्ने नेपालका प्रशिक्षक सुनिल श्रेष्ठ बताउँछन् ।
‘जोर्डन एक बलियो प्रतिद्वन्दी हो र उनीहरुकै घरेलु मैदानमा खेल्दा हामीलाई दवाब अवश्य हुनेछ । हाम्रो पहिलो लक्ष्य भनेको उनीहरुलाई बराबरीमा रोक्ने हो ,’ प्रशिक्षक श्रेष्ठले थपे, यसका लागि हामीले आफ्नो रक्षापंक्ति बलियो बनाउनुपर्नेछ । हामीले काउन्ट अट्याकमा गोल गर्ने मौको सृजना गर्दै त्यसको भरपुर फाइदा उठाउनु पर्नेछ । ‘

आफ्नो टिम छनोट हुनलाई नै जोर्डन आएको र यसको लागि दुई साता अघि भारतविरुद्धको पराजय नै महत्वपूर्ण हुने श्रेष्ठले बताए । ‘हाम्रा केटाहरुको लागि यू १५ च्याम्पियनसिप नै पहिलो प्रतिस्पर्धात्मक प्रतियोगिता थियो । टोलीमा अनुभवको कमी थियो,’ उनले भने , ‘भारतविरुद्ध कोलकातामा भएको फाइनलमा हामी जसरी पराजित भयौं, त्यसले हामीलाई ठूलो पाठ सिकाएको छ । प्रतियोगितालाई लिएर हामी गम्भिर छौं । भारतमा भएका गल्तिहरु हामीले यहाँ दोहो¥याउने छैनौं । यो प्रतियोगिता निकै कठिन छ तर हामी राम्रो प्रदर्शन गर्न लालयित छौं। ‘

नेपाली जुनियर फुटबलमा हालको टिम अहिलेसम्मै कमजोर मध्येको एक रहेको मानिएको छ । तर जोर्डनका प्रशिक्षक अदनान अवाद भने आयोजक भन्दैमा आफ्नो टिमलाई दावेदारको रुपमा हेर्न चाहदैनन् । ‘यो उमेर समुहको फुटबल हो र यहाँ कुनै टिम सानो वा ठूलो हुदैन । श्रीलंका, नेपाल, ताजकिस्तान, कुवेत र हामी पनि उमेर समुहमा एकै किसिमको टोली हौं, ‘अवादले भने, ‘यो प्रतियोगिताको लागि हामीले केही योजनाहरु बनाएको छौं र त्यही अनुरुप खेल्नेछौं ।’ शनिबार नै हुने दोश्रो खेलमा श्रीलंकाले कुवेतको सामना गर्नेछ ।