मनोरञ्जन शर्मा

भैरहवा– सडन डेथमा ग्रेट भिजयन युवा क्लब तरकुल्लाह, ओमसतीयालाई पराजित गर्दै द राइजिङ युवा क्लब कनरी सियारी सातौ थारु मिलन कप नकआउट फुटबल प्रतियोगिताको प्रि क्वाटर फाइनलमा प्रवेश गरेको छ ।

ओम सतियाको कर्महवाडाडा खेल मैदानमा आइतबार निर्धारित समय ग्रेट भिजयन र द राइजिङले १–१ गोलको बराबरी खेलेका थिए । टाइब्रेकरमा पनि ३–३ को बराबरीपछि खेल सडन डेथमा पुगेको थियो । सडेन डेथमा द राइजिङका गोलकिपर आशिष थारुको प्रहार गोलमा परिणत भएको थियो । ग्रेट भिजनका खेलाडीको प्रहार लाई राइजिङका गोलकिपर आशिषले रोकेका थिए ।

टाइब्रेकरमा राइजिङका दशरथ चौधरी, रामगोपाल कहार र देबी चौधरीको प्रहार गोलमा परिणत भएको थियो । अनिल केबट र समकेश केबटको प्रहार खेर गएको थियो । ग्रेट भिजयनका सुसान थारु, अखिलेस पासी र राहुल पासीको प्रहार गोलमा परिणत भयो । वीरेन्द्र पाल भने गोल गर्न असफल भए ।

त्यसअघि ग्रेट भिजनका युवाराज थारुको आत्मघाती गोलमा द राइजिङले अग्रता लिएको थियो । तर ग्रेट भिजयनका केवि चौधरीले गोल फर्काउदै खेललाई बराबरीमा पर्याएका थिए ।

प्रतियोगितामा सोमबारको खेल मैनहवा युवा क्बल मैनहवा र योङ स्टार क्लब मडाहाबीच हुने आयोजक हाटी अमवा युबा क्लबका अध्यक्ष राम बहादुर थारुले जानकारी दिए । प्रतियोगिताको विजेताले टोलीले ७० हजार तथा दोस्रो हुने टोलीले ३५ हजार रुपैयाँ प्राप्त गर्नेछ । प्रतियोगितामा १८ टोलीको सहभागिता छ ।