एजेन्सी – लन्डन क्लब आर्सनलले इंग्लिस प्रिमियर लिग फुटबलमा एस्टन भिल्लामाथि पुनरागमन जित निकालेको छ । घरेलु मैदान इमिरेट्स स्टेडियममा आइतबार राति भएको खेलमा १० खेलाडीमा समेटिएको आर्सनलले खेलमा दुईपटक पछि परेर पनि ३–२ को पूनरागमन जित निकाल्न सफल भएको हो ।

आर्सनलको जितमा निकोलस पेपे, कलुम च्याम्वर्स र पिएरे हेनरिक औवामियाङले गोल गरे । एस्टन भिल्लाका जोन म्याक्जिन र वेस्लेले गोल गरे । खेलको २०औं मिनेटमा जोनले अनवर इएल घाँजीको पासमा गोल गर्दै भिल्लालाई अघि बढाएका थिए । ४१औं मिनेटमा आर्सनल १० खेलाडीमा समेटियो । आर्सनलका एन्सले मेटल्यान्ड नाइल्स दोहोरो पहेँलो कार्ड खादै मैदानबाट बाहिरिएका थिए । तर, त्यसको असर आर्सनललाई परेन ।

५९औं मिनेटमा निकोलस पेपेले पेनाल्टीमार्फत बराबरी गोल फर्काए । त्यसको एक मिनेटपछि नै वेस्लेले गोल गर्दै भिल्लालाई पसन खेलमा २–१ को अग्रता दिलाए । ८१औं मिनेटमा कलुम च्याम्वर्सले गोल गर्दै खेललाई पुन २–२ गोलको बराबरीमा ल्याए । ८४औं मिनेटमा पिएरे हेनरिक औवामियाङले गोल गर्दै आर्सनललाई ३–२ को पूनरागमन जित दिलाए ।

जितसँगै आर्सनल ६ खेलबाट ११ अंक जोडेर चौथो स्थानमा उक्लिएको छ । पराजित भिल्ला ४ अंक जोडेर १८औं स्थानमा छ ।