काठमाडौं (हाम्रो खेलकुद)– नेपाल महिला राष्ट्रिय टोली प्रशिक्षणका लागि पोखरा जाने भएको छ । स्वदेशमा मंसिर १५ गतेदेखिन २४ गते सम्म आयोजना हुने १३ औं दक्षिण एसियाली खेलकुदलाई लक्षित गर्दै अखिल नेपाल फुटबल संघ (एन्फा) ले तयारी थालेको छ । त्यहि सिलसिलामा महिला टोली पोखरा जान लागेको हो ।

पोखरामा नेपाली सेना र सहरा क्लबले सञ्चालन गरेको एकेडेमीमा प्रशिक्षणका लागि आग्रह गरिएको महिला टोलीका मुख्य प्रशिक्षक हरि खड्काले जानकारी दिए । उनका अनुसार दशै अघि एक साता नेपाली टोलीले पोखरामा प्रशिक्षण गर्नेछ । नेपाली महिला टोली केहि दिन अघि किर्गिस्तानमा नादेझ्दा कप खेलेर फर्केको थियो ।

४ राष्ट्रको सहभागिता रहेको नादेझ्दा कपमा नेपाल दोस्रो भएको थियो । भदा २६ गते भएको फाइनलमा नेपाली टोली उज्वेकिस्तानसँग ३–२ ले पराजित भएको थियो । आयोजक कीर्गिस्तानलाई ८–२ ले हराएको नेपालले राउन्ड रोविनकै अर्को खेलमा उज्वेकिस्तानसँग २–० को हार बेहोरेको थियो । राउन्ड रोविनको अन्तिम खेलमा ताजकिस्तानलाई १–० ले हराउँदै नेपाल फाइनल पुगेको थियो ।

सोही प्रतियोगिता फरवार्ड सावित्रा भण्डारी सम्बा ७ गोलसहित सर्वाधिक गोलकर्ता बनिन् । सोही प्रतियोगिताका दौरान उनले नेपालका लागि सर्वाधिक गोल गर्ने महिला खेलाडी अनु लामासँग बराबरी गरिन् । दुवैको समान ३५ अन्तर्राष्ट्रिय गोल पुगेको छ ।

घरेलु मैदानमा आयोजना हुने सागमा नेपाल स्वर्ण पदक जित्ने लक्ष्यका साथ तयारी गरिरहेको प्रशिक्षक खड्काले बताए । लगातार फाइनल खेले पनि नेपाली महिला टोली सागका फाइनल जित्न असफल रहँदै आइरहेको छ । महिला फुटबलमा नेपालले लगातार तीन पटक रजत पदक जितेको थियो ।