एजेन्सी – लिभरपुलका रक्षक भर्जिल भान डाइकले अर्जेन्टिनी सुपर स्टार लियोन मेस्सीसँग आफ्नो तुलना गर्नु उपयुक्त नहुने बताएका छन् । भान डाइक र पोर्चुगिज सुपर स्टार क्रिस्टियानो रोनाल्डोलाई पछि पार्दै सोमबार मेस्सीले फिफा द बेस्ट अवार्ड जितेका छन् ।

अघिल्लो महिना भएको युइएफए अवार्ड भने मेस्सी र रोनाल्डोलाई पछि पार्दै भान डाइकले जितेका छन् । च्याम्पियनसिप लिग विजेता लिभरपुलका भान डाइक वर्षको उत्कृष्ट टोलीको सदस्य बनेका छन् । डच खेलाडी भान डाइकले हरेकले निर्णयको सम्मान गर्नुपर्ने पनि बताएका छन् ।

फिफाका सदस्य राष्ट्रका फुटबल टोलीका कप्तान, प्रशिक्षक र एक खेल पत्रकारको मतदानको आधारमा द वेष्ट अवार्ड विजेताको टुंगो लगाउने गरिन्छ । भान डाइक आफैंले पनि मेस्सीलाई पहिलो रोजाइमा मतदान गरेका थिए ।

‘जसले यसमा भाग लिएर मतदान गरे । हामीले त्यसको सम्मान गर्नुपर्दछ ,’ भान डायकले भने । उनले मेस्सीसँग आफ्नो तुलना गर्नु नहुने बताए । उनले हामी दुई नितान्त फरक खेलाडी हौं । उनले मेस्सीका साथ अवार्डका लागि मञ्चमा उभिनुलाई गर्वको क्षण भएको पनि बताए ।

‘ मलाई लाग्छ मेस्सी र मलाई तुलना गर्नु उपयुक्त हुन्न । किनकी हामी फरक खाले खेलाडी हौं,’ उनले थपे,‘म यो समारोहमा आउँदा निकै गौरव महसुस गरिरहेको छु ।’