सुबास हुमागाईं, काठमाडौं

नेपाली राष्ट्रिय यू-१८ फुटबल टोलीका मुख्य प्रशिक्षक चेतनारायण श्रेष्ठले साफ यू-१८ च्याम्पियनसिपमा खराब प्रदर्शनसँगै पदबाट राजीनामा दिने घोषणा गरेका छन् ।

साविक विजेता नेपालले घरेलु मैदानमा खराब प्रदर्शन गरेपछि श्रेष्ठ दबाबमा रहेका थिए । माल्दिभ्ससँग पहिलो खेल बराबरी खेलेपछि दोस्रो खेलमा नेपाल भुटानसँग ३-० को लज्जास्पद हार बेहोर्दै प्रतियोगिताबाट बाहिरिने संघारमा पुगेको थियो । समूहको अन्तिम खेलमा भुटान र माल्दिभ्सको खेल गोलरहित बराबरीमा सकिएपछि नेपाल प्रतियोगिताबाट बाहिरिएको हो ।

श्रेष्ठले आफूले अपेक्षित नतिजा दिन नसकेपछि नैतिकताका आधारमा पदत्याग गरेको बताए । ‘मैले अपेक्षित नतिजा दिन सकिन त्यसैले पद छाड्दैछु । भुटानविरुद्ध निकै नै अप्रत्याशित नतिजा आएपछि हाम्रो यात्रा टुंगिन पुगेको छ । हामीले भुटानको स्तरलाई कमजोर आँक्दा हार बेहोर्नु पर्यो । अब नैतिकताको आधारमा पनि मैले यस पदमा रहनु ठिक ठानिन,’ उनले भने । श्रेष्ठले औपचारिक रुपमा भने एन्फामा राजीनामा बुझाउन बाँकी रहेको बताए ।

श्रेष्ठले दुई खेलमात्र भएपनि विभिन्न कारणले आफूले नतिजा दिन नसकेको बताए । ‘ एक हिसाबमा भन्ने हो भने केहि अभागी भएजस्तो पनि लाग्छ । पहिलो खेलमा बराबरी खेल्दा त्यति नराम्रो प्रदर्शन थिएन । दोस्रो खेलमा सुरुवातमै वर्षा भयो । खेलाडीहरुले पनि त्यसपछि प्रदर्शन गर्न सकेनन् । भुटानको स्तर निकै माथि पुगिसकेको त्यहाँ मैदानमा मैले बुझें । बाहिरबाट हेर्दा भन्दा हामी भित्र रहेकालाई यसले थप गाह्रो बनाएको छ,’ श्रेष्ठले थपे ।

श्रेष्ठले पद छाड्ने निर्णयले नेपाली फुटबललाई पनि एक संदेश हुने बताए । ‘ हामीमाथि नेपाली फुटबलले आशा राखेको थियो । जे जस्तो कारण भएपनि अन्तिममा नतिजा नै महत्त्वपूर्ण हुन्छ । मैले नतिजा दिन सकिन, त्यसैले पद छाड्दैछु । आशा छ यसले आउने दिनमा अन्य प्रशिक्षकलाई पनि अपेक्षित नतिजा नल्याएको खण्डमा दबाब सिर्जना हुनेछ,’ उनले थपे ।

एन्फाका महासचिव इन्द्रमान तुलाधरले यसबारे जानकारी भएपनि औपचारिक रुपमा राजिनामा आउन बाँकी रहेको बताए । उनले राजिनामा आएपछि श्रेष्ठसँगै प्रशिक्षण टोलीका सहायक प्रशिक्षक सनोज श्रेष्ठ र गोलरक्षक प्रशिक्षक छन्नुराम चौधरी पनि जिम्मेवारीबाट मुक्त हुने जानकारी दिए । नेपालले अर्को महिना खेल्ने एएफसी यू-१९ च्याम्पियनसिपको छनोटमा नयाँ प्रशिक्षण टोली नियुक्त हुनेछ । उक्त प्रतियोगितामा नेपाल रहेको समूह ‘डी’ मा यूएई, इरान र किर्गीस्तान रहेका छन् ।