एजेन्सी – च्याम्पियनसिप क्लब नथिङघम फरेष्ट क्लबमाथि फराकिलो जित निकाल्दै प्रिमियर लिग क्लब आर्सनल इंग्लिस फुटबल लिग कप (इएफएल) को चौथो चरणमा प्रवेश गरेको छ ।

घरेलु मैदान इमिरेट्स स्टेडियममा मंगलबार राति भएको खेलमा ग्याब्रियल मार्टिनेलीको दुई गोल सहयोगमा आर्सनलले नथिङघममाथि ५–० को फराकिलो जित निकालेको हो । रव होल्डिङ, जोसेफ विललक र रेइस नेल्सनले गोल गरे ।

खेलको शुरुवातदेखि नै दोस्रो डिभिजनको क्लबलाई दवावमा राखेको आर्सनलले पहिलो गोलको लागि ३१औं मिनेट कुर्नुपरेको थियो । कलुम चेम्वर्सको पासमा ग्याब्रियल मार्टिनेलीले गोल गर्दै आर्सनललाई अघि बढाए । पहिलो हाफमा १–० को झिनो अग्रता लिएको आर्सनलले दोस्रो हाफमा ४ गोल गर्न सफल भयो ।

७१औं मिनेटमा रव होल्डिङले गोल गर्दै अग्रता दोब्बर पारे । होल्डिङले १० महिनापछि आर्सनलका लागि गोल गरेका हुन् । होल्डिङ चोटका कारण मैदान बाहिर रहेका थिए । ७७औं मिनेटमा जोसेफले हेक्टर बर्लिनको पासमा गोल गरे ।

८४औं मिनेटमा रेइस नेल्सनले गोल गर्दै आर्सनललाई फराकिलो जिततर्फ अग्रसर गराए । इन्ज्युरी समयमा ग्याब्रियल मार्टिनेलीले व्यक्तिगत दोस्रो तथा टिमका लागि पाँचौ गोल गर्दै आर्सनललाई ५–० को फराकिलो जित दिलाए । नथिङघमले भने कुनैपनि समय आर्सनलको पोस्टमा गतिलो आक्रमण बुन्न सकेन ।