एजेन्सी – स्पेनिस फुटबल टोलीका पूर्व प्रशिक्षक भिसेन्टे डेल बोस्केले क्रिस्टियानो रोनाल्डो र लियोन मेसीलाई अहिले सम्मकै उत्कृष्ट खेलाडी भएको बताएका छन् । विश्व कप विजेता डेल बोस्केले अर्जेन्टिनाका सुपर स्टार मेस्सी विश्वकै उत्कृष्ट खेलाडी भएको उल्लेख गरेका छन् ।

तर, उनी रोनाल्डो पनि उनी भन्दा कम नभएको प्रष्ट पारेका छन् । कतिपयले पोर्चुगिज सुपरस्टार रोनाल्डोको दिन सकिएको टिप्पणी गरेको स्मरण गर्दै डेल बोस्कीले उनले रियल म्याड्रिड छाड्दा खासै क्लबलाई दुःख नमानेको बताए । तर, डेल बोस्के रोनाल्डो र मेस्सीमा क्षमताको कुनै सिमा नरहेको बताउँछन् ।

‘ हो मेरा लागि उनी उत्कृष्ट खेलाडी हुन् । उनी अहिले सम्मकै उत्कृष्ट खेलाडी हुन् । तर, त्यसको मतलब रोनाल्डोको क्षमता उनको अगाडि कमजोर होइन,’ उनले स्मरण गरे,‘ गत वर्ष कतिपयले रोनाल्डोको खेल जीवन अब सकिएको टिप्पणी गरेका थिए । तर, त्यस्तो केहि भएन । मेस्सी र रोनाल्डोको प्रतिभाको कुनै सिमा छैन ।’

डेल बोस्के त्यतिमा रोकिएनन् । उनले पेरिस सेन्ट जर्मेन (पिएसजी) का युवा स्टार केलियन एमबाप्पेको पनि तारिफ गरे । उनले क्षमताका आधारमा हर्ने हो भने एमबाप्पे रोनाल्डो र मेस्सीको पथमा रहेको बताएका छन् । यद्दपी मोनाकाका पूर्व स्टार एमबाप्पले भन्दा ब्राजिलियन स्टार नेयमार उत्कृष्ट रहेको बताएका छन् । तर, नेयमारलाई पछ्याउने समर्थक भने कम रहेको डेल बोस्केको भनाई छ ।

‘रोनाल्डो र मेस्सीमा भएको जस्तो सबै खाले गुण एमबाप्पेमा छ । तर उनले आफुलाई प्रमाणित गर्न अझै बाँकी छ ,’ उनले थपे,‘ एमबाप्पे भन्दा नेयमार उत्कृष्ट हुन् । तर, कतिपय विवादस्पद कामका कारण उनी धेरैको उदाहरण बन्न सकेनन् । यद्दपी एउटा खेलाडीका रुपमा उनी उत्कृष्ट हुन् ।’