एजेन्सी – इंग्लिस प्रिमियर लिग फुटबलमा लेस्टर सिटीले न्यु क्यासल युनाइटेडमाथि शानदार जित निकालेको छ । घरेलु टोली लेस्टरले १० खेलाडीमा समेटिएको न्यु क्यासलमाथि ५–० को शानदार जित निकालेको हो ।

किङ पावर स्टेडियममा आइतबार राति भएको खेलमा लेस्टरको जितमा जेमी भार्डीले दुई तथा रिकार्डाे पिरेरा र एलडिडिले गोल गरे । एक गोल उपहार पाएको थियो ।

खेलको १६औं मिनेटमा रिकार्डाेले गोल गर्दै लेस्टरलाई अग्रता दिलाए । ४३औं मिनेटमा न्यु क्यास्टल १० खेलाडीमा समेटियो । इसाक हेडनले डेनिस प्राइटलाई फल गरेपछि रेफ्रीले सोझै रातो काड देखाउदै मैदान बाहिर पठाएका थिए ।

त्यसको फाइदा लेस्टर सिटीले दोस्रो हाफमा उठायो । ५४औं मिनेटमा जेमी भार्डीले गोल गर्दै अग्रता दोब्बर पारे । ५७औं मिनेटमा पउल डुम्मिटले आत्मघाती गोल गरेपछि लेस्टरले ३–० ले अग्रता दिलाए ।

६४औं मिनेटमा भार्डीले व्यक्तिगत दोस्रो गोल गरेपछि लेस्टले खेलमा ४–० को आरामदायी अग्रता बनायो । ९०औं मिनेटमा वेलफ्रेड एलडिडिले गोल गर्दै लेस्टरलाई ५–० को फराकिलो जित दिलाए ।

जितसँगै लेस्टर ७ खेलबाट १४ अंक जोडेर तेस्रो स्थानमा उक्लिएको छ । न्यु क्यास्टल ५ अंक जोडेर १९औं स्थानमा छ । अपराजित लिभरपुल २१ अंक जोडेर शीर्षस्थानमा रहँदा म्यानचेस्टर सिटी १६ अंकसहित दोस्रो स्थानमा छ ।