सुबास हुमागाईं, सिड्नी

इंग्लिस प्रिमियर लिग अन्तर्गत शनिबार भएको ब्राइटन एन्ड होभ आल्बियन र टोटेनहम हट्सपरबीचको खेल प्रशिक्षक नेपाली राष्ट्रिय फुटबल टोलीका प्रशिक्षक योहान कालिनका लागि फरक महत्त्व बोकेको थियो । कारण नेपालको विश्वकप छनोटको प्रतिद्वन्द्वी अष्ट्रेलियाका दुई मुख्य खेलाडी म्याट रायन र आरोन मोय यस खेलमा ब्राइटनका लागि खेल्दै थिए ।

गोलरक्षक रायन र मिडफिल्डर मोय दुवैले खेलमा उत्कृष्ट प्रदर्शन गरे र ब्राइटनलाई अप्रत्याशित ३-० को अन्तरको जित दिलाउन महत्त्वपूर्ण भूमिका निर्वाह गरे । बक्स टु बक्स मिडफिल्डरको भूमिकामा रहेका मोय अष्ट्रेलियाको राष्ट्रिय टोलीमा भने केहि आक्रामक भूमिकामा देखिने अपेक्षा गरिएको छ । यता गोलरक्षक म्याट रायनले गत सिजनको युरोपेली च्याम्पियन्स लिग उपविजेता स्पर्सविरुद्ध केहि राम्रो बचाउ गर्दै आफ्नो स्तर सिद्ध पारे ।

प्रशिक्षक कालिनले मोय र रायनको प्रशंसा गर्दै उच्च स्तरको खेलाडीको सामना गर्न तयार रहेको बताए । ‘ हामीले अहिलेसम्म प्रिमियर लिग, बुन्डेसलिगा, लगायत युरोपेली लिग खेल्ने खेलाडीको सामना गरेका छैनौं । हाम्रा खेलाडीको लागि यो नयाँ चुनौती र अनुभव हुनेछ,’ उनले थपे, ‘ मोयजस्ता खेलाडीले लगातार लिभरपुल, म्यानचेस्टर सिटी जस्ता टोलीको सामना गरेका हुन्छन् । अब हामीले उनीहरुको सामना गर्दैछौं । उनीहरु पनि खेलाडी हुन् र स्तरको सम्मान गर्नेछौं, तर त्यति सम्मान होइन कि हामीले भिड्नेछैनौं । प्रिमियर लिग खेलाडीलाई ट्याकल गर्न पाउने अवसर पनि हो ।’

प्रशिक्षक कालिनले नेपाली फुटबलको सर्वाधिक ठुलो खेलका लागि नेपाली टोली पूर्ण तयार रहेको बताए । ‘हामीले निकै राम्रो तयारी गरेका छौं । अष्ट्रेलिया आएर यस वातावरणमा प्रशिक्षण गर्ने अवसर जुटेको छ । सुरुवाती केहि दिन यहाँ रहेका समर्थकलाई रोक्न नै कठिन भएपनि व्यावास्थापनले पछिल्लो दुई दिन सहज बनाएको छ । अब क्यानबेराको खेलका लागि अझै केहि महत्त्वपूर्ण समय बाँकी नै छ,’ उनले थपे ।

नेपालका लागि ३ खेलाडी मात्र विदेशी लिगमा होमिएको अवस्थामा अष्ट्रेलियाको नेपालविरुद्ध घोषित २३ सदस्यीय टोलीमा भने मात्र ४ खेलाडी अष्ट्रेलियाको लिग खेल्छन् । अधिकांश खेलाडी युरोपेली लिगमा नै आबद्ध छन् । त्यसमध्य अधिकांश खेलाडी आ-आफ्नो टोलीको पहिलो रोजाईमा खेल्दै आएका छन् । प्रिमियर लिगमा मोय र रायनसँगै जर्मनीको हर्था बर्लिनमा म्याथ्यु लेकि प्रभावशाली खेलाडीमा गनिन्छन् ।

अष्ट्रेलियाली टोलीमा नेपालविरुद्ध खेलका लागि अनुभवी डिफेन्डर ट्रेन्ट सेन्सबरी भने समेटिएका छैनन् । उनलाई प्रशिक्षक ग्राहम आर्नल्डले चोटका कारण अर्को खेलसम्मका लागि विश्राम दिएका छन् । यद्यपि टोलीमा कप्तान मार्क मिलिगनको पुनरागमनले टोलीलाई केहि सहज हुनेछ । कुवेतविरुद्ध खेल गुमाएका मिलिगन इंग्ल्याण्डको तेस्रो श्रेणीको साउथएन्ड युनाइटेडबाट खेल्दै आएका छन् ।

नेपालका लागि इन्डोनेसिया लिग खेल्दै गरेका रोहित चन्द र माल्दिभ्सको शीर्ष डिभिजन खेलेका विमल घर्तिमगरसँगै किरण चेम्जोङ भारतको आई लिग टोलीमा अनुबन्धित छन् । अन्य खेलाडी भने नेपालको घरेलु फुटबल पुन: शान्त रहँदा राष्ट्रिय टोलीको प्रशिक्षणकै भरमा छन् । प्रशिक्षणकै भरमा कुनै खेल नखेली टोली विश्वकपको नियमित सहभागी टोली अष्ट्रेलियासँग सामना गर्दैछ ।