सुबास हुमागाईं, क्यानबेरा
विश्व कप छनोटअन्तर्गत नेपाल र अष्ट्रेलियाबीचको खेल दुवै प्रशिक्षकले अनुमान गरे जस्तो भएन । नेपाली टोलीका प्रशिक्षक योहान कालिनले भने जस्तो अप्रत्यासित पनि भएन ।

त्यस्तै अष्ट्रिेलियाका प्रशिक्षकले भने जस्तो धेरै भन्दा धेरै गोल पनि भएन । अष्ट्रेलियाको क्यानबेरामा जारी विश्व कप छनोट खेलमा घरेलु टोलीसँग नेपाल ५–० ले पछि परेको छ ।

अस्ट्रेलियाका जिमि म्याकलेमले ह्याट्रिक र ह्यारी सौटरले समान २ गोल गरेका छन्। नेपालले निरन्तर दवाब खेपेको थियो ।खेलको छैटौं मिनेटमा नै नेपालले गोल खाएको थियो । नेपाली गोलकिपर किरणबाट रिवाउन्डमा आएको बलमा जिमिले गोल गरेका थिए । १९ औं मिनेटमा जिमिले अर्को गोल थपे ।

२४ औं मिनेटमा ह्यारीले टिमका लागि तेस्रो र व्यक्तिगत पहिलो गोल गरेका छन् । ह्यारीको त्यो डेब्यू गोल थियो । ह्यारीले ५९ मिनेटमा अर्को गोल गरे । उनले हेडमार्फत गोल गरेका थिए । जिमीले अन्तिम मिनेटमा गोल गर्दै ह्याट्रिक गरेका थिए ।

विश्व कप छनोटका अहिले सम्मका ३ खेलमा नेपालको यो दोस्रो हार हो । गत महिनाको पहिलो खेलमा कुवेतसँग ७–० ले पराजित भएको नेपाली टोली अर्को खेलमा चाइनिज ताइपेलाई २–० ले हराएको थियो । त्यो खेलमा दवै गोल अन्जन विष्टले गरेका थिए । अष्ट्रेलियाले भने खेलको दुवै खेल जितेको छ । यसअघि टोलीले कुवेतलाई ३–० ले हराएको थियो ।

नेपाली टोली
गोलकिपर –किरण चेम्जोङ (कप्तान)
फिडेन्स – रञ्जित धिमार, दिनेश राजवंशी, देवेन्द्र तामाङ, अनन्त तामाङ
मिडफिल्ड – रवि पासवान, विशाल राई(८६’ सन्तोष तामाङ), सुजल श्रेष्ठ, रोहित चन्द, अन्जन विष्ट (७८’ विक्रम लामा)
फरवार्ड – अभिषेक रिजाल (६६’ विमल घर्तिमगर)