काठमाडौं (हाम्रो खेलकुद)– भुटानमा जारी महिला साफ यू १५ च्याम्प्यिनसिपमा आजको खेल नेपालका लागि महत्वपूर्ण रहेको छ । नेपालले आज पूर्व विजेता बंगलादेशको सामना गर्दैछ । थिम्पुस्थित चाङलिमिथाङ रंगशालामा नेपाली समय अनुसार दिउँसो २ः४५ बजे खेल सुरु हुनेछ ।

पहिलो खेलमा साविक विजेता भारतसँग ४–१ को हार बेहोरेको नेपालका लागि आजको खेल गर वा मरको अवस्थामा छ । बंगलादेशले भने भुटानलाई २–० ले हराउँदै विजयी सुरुवात गरिसकेको छ । आजको खेल हारेमा नेपाल लगभग च्याम्प्यिनसिपबाट बाहिरिन सक्छ । यू १५ च्याम्पियनसिपमा नेपालको इतिहास सन्तोषजनक छैन ।

यसअघिका दुवै संस्करणमा नेपाल कमजोर रहँदै आएको छ । सन् २०१७ मा भएको पहिलो संस्करणमा सहभागी ४ टोलीमध्ये नेपाल पुछारमा रहेको थियो । त्यति बेला पहिलो खेलमा बंगलादेशसँग ६–० ले पराजित भएको नेपाल भारतसँग १०–० ले पराजित भएको थियो । नेपालले अन्तिम खेलमा भुटानसँग १ –१ को बराबरी खेलेको थियो ।

गत वर्ष भुटानमै भएको च्याम्पियनसिपमा नेपाल चौथो भएको थियो । ६ टोलीको सहभगिता रहेको च्याम्पियनसिपमा नेपाल समूह चरणमा बंगलादेश र पाकिस्तानसँग परेको थियो । पाकिस्तानलाई ४–० ले हराएको नेपाल  बंगलादेशसँग ३–० ले पराजित भएको थियो ।उपविजेताका रुपमा सेमिफाइनल पुगेको नेपाल त्यहाँ भारतसँग २–१ ले परातिज भयो ।

तेस्रो स्थानको खेलमा पनि नेपाल भुटानसँग टाइब्रेकरमा पराजित भएको थियो । २–२ को बराबरीपछिको टाइब्रेकरमा नेपाल ४–३ ले पराजित भएको थियो । यसअघिका दुई संस्करणमा भारत र बंगलादेशबीच मात्र फाइनल भएको छ । पहिलो संस्करणमा बंगलादेश र दोस्रो भारत च्याम्पियन बनेको थियो ।

यसपटक ४ टोलीको सहभागिता रहेको च्याम्पियनसिपको फाइनल पुग्ने सम्भावना जीवित राख्न नेपालले बंगलादेशलाई हराउँनै पर्ने बाध्यता छ । । यू १५ मा यसअघिका दुवै भेटमा नेपाल बंगलादेशसँग पराजित भएको थियो ।

बंगलादेशविरुद्धको नेपाली टोलीको सुरुवाती ११