काठमाडौं (हाम्रो खेलकुद) – नेपाल र आयोजक भुटान साफ यू १५ च्याम्पियनसिपबाट बाहिरिएका छन् । थिम्पुस्थित चाङलिमिथाङ रंगशालामा शुक्रबार साँझ भारतसँग १०–१ ले पराजित भएपछि भुटान र नेपाल पनि च्याम्पियनसिपबाट बाहिरिएको छ । त्यसअघि बंगलादेशले नेपाललाई २–१ हराएको थियो ।

बंगलादेश र भारतले दुवै खेल जिते । नेपाल र भुटानले लगातार दुई खेल हारे । फाइनल पुगेका भारत र बंगलादेशबीच राउन्ड रोविनअन्तर्गतको खेल आइतबार हुनेछ । सोहि दिन नेपाल र भुटानबीच प्रतिस्पर्धा हुनेछ । फाइनल मंगलबार हुनेछ । नेपाल पहिलो खेलमा भारतसँग ४–१ ले र भुटान बंगलादेशसँग २–० ले पराजित भएको थियो । महिला साफ च्याम्पियनसिपमा फेरि एक पटक कमजोर प्रदर्शन गर्दै नेपाली टोली फर्कने भएको छ ।

साफ यू १५ महिला टोलीमा नेपाल सेमिफाइनल भन्दा अघि बढ्न सकेको छैन । सन् २०१७ मा भएको पहिलो संस्करणमा सहभागी ४ टोली मध्ये नेपाल पुछारमा रहेको थियो । त्यति बेला पहिलो खेलमा बंगलादेशसँग ६–० ले र भारतसँग १०–० ले पराजित नेपाली टोलीले भुटानसँग १ –१ को बराबरी खेलेको थियो ।

गत वर्ष भुटानमै भएको च्याम्पियनसिपमा नेपाल चौथो भयो । ६ टोलीको सहभागिता रहेको च्याम्पियनसिपमा नेपाल समूहको उपविजेता बनेको थियो । पाकिस्तानलाई ४–० ले हराएको नेपालले बंगलादेशसँग ४–० को पराजय भोगेको थियो ।

सेमिफाइनलमा भारतसँग २–१ ले पराजित नेपालले तेस्रो स्थानका लागि भएको प्रतिस्पर्धाको टाइब्रेकरमा भुटानलाई नतिजा सुम्पेको थियो । २–२ को बराबरीपछिको पेनाल्टीमा नेपाल ४–३ ले पराजित भएको थियो । यसअघिका दुई संस्करणको फाइनल पनि भारत र बंगलादेशबीच भएको थियो । पहिलो संस्करणमा बंगलादेश र दोस्रोमा भारत च्याम्पियन बनेको थियो ।