काठमाडौं (हाम्रो खेलकुद) – तेस्रो संस्करणको चन्द्रागिरी मेयर गोल्डकप ‘ए’ डिभिजन स्तरीय फुटबल प्रतियोगिता कात्तिक अन्तिमदेखि हुने भएको छ ।

आयोजक दीपशिखा समूहले तेस्रो संस्करणको चन्द्रागिरी मेयर गोल्डकप ‘ए’ डिभिजन स्तरीय फुटबल प्रतियोगिता कात्तिक ३० देखि मंसिर ७ गतेसम्म हुने जानकारी गराएको हो । यसका लागि अखिल नेपाल फुटबल संघ (एन्फा) बाट स्वीकृति पाइसकेको प्रतियोगिता संयोजक तथा पूर्व राष्ट्रिय खेलाडी रमेश बुढाथोकीले जानकारी गराए ।

प्रतियोगितामा आयोजकको दुई टोलीसँगै ‘ए’ डिभिजनका ८ देखि १० टोलीको सहभागिता रहन सक्ने छ । आयोजकबाट दीपशिखा युवा समूह र चन्द्रागिरी नगरपालिकाका १५ वडाबाट खेलाडी छनोट गरी अर्काे टोली तयार पारिनेछ ।  संयोजक बुढाथोकीले प्रतियोगितामा सहभागिताका लागि क्लबलाई पत्र पठाउने कार्य शुरु भइसकेको बताए ।

यसवर्ष पुरस्कार राशिमा ५० हजार रुपैया वृद्धि गरिएको छ । यसवर्षको विजेताले ६ लाख ५० हजार रुपैयाँ पाउनेछ । दोस्रो हुनेले ३ लाख ५० हजार रुपैयाँ हात पार्नेछ । गतवर्ष ६ लाख र ३ लाख रुपैयाँ पुरस्कार राशि रहेको थियो । सर्वाेत्कृष्ट खेलाडी र सर्वाधिक गोलकर्ताले समान ३० हजार रुपैयाँ प्रदान गरिनेछ ।

पहिलो संस्करणमा हिमालय शेर्पा क्लब तथा दोस्रो संस्करणमा भ्याली च्यासल युथ क्लब च्याम्पियन बनेको थियो । खेलहरु चन्द्रागिरी नगरपालिकास्थित नैकाप फुटबल मैदानमा हुनेछ ।