एजेन्सी – दक्षिण कोरियाका कप्तान तथा इंग्लिस क्लब टोटेनहमका फरवार्ड ह्युङ मिन सनले दुई कोरियाबीचको विश्वकप छनोटको डर्बी खेलको आफ्नो अनुभव साटेका छन् । 

सुरक्षित रुपमा कोरियामा अवतरण गरेपछि कप्तान सनले प्रत्यक्ष प्रसारण, दर्शक र अन्तर्राष्ट्रिय मिडिया नभएको खेल निकै नै आक्रमक भने व्याख्या गरेका छन् । मंगलबार राति किम सेकेन्ड सुङ स्टेडियममा भएको सन्नटापुर्ण खेलमा दक्षिण कोरियाका दर्शक र पत्रकारलाई प्रतिबन्ध लगाइएको थियो । खेलको प्रत्यक्ष प्रसारण समेत भएको थिएन ।

कोरिया फुटबल संघले खेलको प्रत्यक्ष जानकारीका लागि दुई कर्मचारी पठाउने अनुमति पाएको थियो । ति दुई कर्मचारीले नै कोरियन फुटबल संघलाई खेलबारे जानकारी गराएका थिए । खेल गोलरहित बराबरीमा सकिएको थियो । उत्तरले खेलपछि र दक्षिणका खेलाडीहरु स्वदेश फर्किएपछि खेलको भिडियो टेप र केही तस्बिरहरु दिन सहमत भएको थियो ।

दक्षिणका खेलाडीहरु फर्किएपछि खेलको फुटेज र केही तस्बिरहरु विभिन्न सञ्चारमाध्यममा पोस्ट भएको थियो । फिफा वरीयतामा उत्तर कोरिया ११३औं स्थानमा छ । उसले घरेलु मैदानमा आफुभन्दा माथि रहेको (३७) दक्षिण कोरियालाई बराबरीमा रोक्न सफल भएको थियो । सनले स्वदेश फर्किएलगत्तै खेलबारे मुख खोलेका हुन् ।

‘यो एकदमै खराब हो । हामीले खेल जितेनौ । खेल यति सम्मको आक्रमक थियो कि हामीले सोच्नै सकेनौ । यति हुँदा हुँदैपनि चोटपटक विना सुरक्षित रुपमा घर फर्कनुपनि एउटा ठुलो उपलब्धि हो ,’ २७ वर्षे कप्तान सनले सञ्चारकर्मीसँगको कुराकानीका क्रममा भने,’ उत्तरका खेलाडीहरुले सपथै खाएर संवेदनशील र आक्रमक खेलेको देखियो । म खाली स्टेडियम देखेर आश्चर्यमा भने परिन ।’

कोरियन फुटबल संघका उपाध्यक्ष चोइ योङ इलले गोलरहित बराबरीको खेललाई उत्तरले कसरी सञ्चाल ग¥यो भनेर आलोचना गरेका छन् । ‘यो एक युद्ध जस्तै थियो । मैले फुटबलमा यस्तो अहिलेसम्म देखेको थिएन ’ उपाध्यक्ष इलले भने । दक्षिण कोरियाका प्रशिक्षक पाउलो बेन्टोले टोलीले पहिलो हाफमा सोचेजस्तो खेल्न नसकेको दोस्रो हाफ उत्कृष्ट रहेपनि रेफ्रीका कारण बराबरीमा रोकिन परेको बताएका छन् ।

यि दुई टोलीले १९९० को मैत्रीपुर्ण खेलपछि पहिलो पटक उत्तर कोरियामा खेलेको हो । यि दुई टोलीबीच ४ जुन २०२० मा सियोलमा र्काे खेल हुदैछ । उत्तरले प्रतिबन्ध लगाएजस्तै दक्षिणले घरेलु मैदानमा हुने खेलमा के गर्ने हो त्यो भने हेर्न बाँकी छ ।