टेक्सस (एजेन्सी– भेनेजुएलासँग १–१ को बराबरी खेलेपछि मेक्सिको अमेरिकामा जारी कोपा अमेरिका सेन्टेनारियोअन्तर्गत समूह सीको विजेता बनेको छ । मेक्सिको र भेनेजुएला यसअघि नै अन्तिम आठमा पुगेका थिए भने उक्त समूहबाट उरुग्वे र जमैका अन्तिम खेलअघि नै बाहिरिसकेका थिए ।
टेक्सासस्थित रिलाइन्ट रंगशालामा जोसे वेलाजक्वेजको गोलबाट भेनेजुएलाले १० औं मिनेटमा अग्रता लिएको िथयो । तर खेल सकिन १० मिनेटअघि जिसस कोरोनाले बराबरी गोल फर्काएपछि मेक्सिको समूह विजेता बन्न सफल भएको हो ।
समान ७ अंक भएपनि गोल अन्तरमा मेक्सिको शीर्षस्थानमा र भेनेजुएला दोस्रो स्थानमा रहे ।
मंगलबार बिहान भएको समूहको अर्को अर्थहिन खेलमा जमैकालाई ३–० ले हराउँदै उरुग्वेले सान्तवना जित हासिल गरेको छ । अबेल हर्नान्डेजले २१ औं मिनेटमा पहिलो गोल गरे भने जे भाउग वाटसनको आत्मघाती गोलमा उरुग्वेले ६७ औं मिनेटमा अग्रता दोब्बर पारेको थियो । खेल सकिन एक मिनेट बाँकी रहँदा माथिस कुर्जोले उरुग्वेका लागि गोल थपेका थिए । मेक्सिकोले समूह डीको उपविजेता र भेनेजुयलाले समूह डीको विजेतासँग क्वार्टरफाइनल खेल्नेछन् ।
बुधबार समूह डीमा चिलिले पानामा र अर्जेन्टिनाले बोलेभियासँग प्रतिस्पर्धा गर्नेछ । क्वार्टरफाइनल पुगिसकेको अर्जेन्टिनाको ६ अंक छ भने समान तीन अंक भएका चिली दोस्रो र पानामा तेस्रो स्थानमा छ । बोलेभिया प्रतियोगिताबाट बाहिरिसकेको छ ।
