काठमाडौं (हाम्रो खेलकुद)– कतारबाट यू २३ को फुटबल टोली आइतबार स्वदेश फर्कने भएको अखिल नेपाल फुटबल संघ (एन्फा) ले जनाएको छ । स्वदेशमा अर्को महिना आयोजना हुने १३ औं दक्षिण एसियाली खेलकुद (साग) को तयारीमा रहेको फुटबल टोली म्यानमारको यू २२ टोलीसँग मैत्रीपूर्ण खेलका लागि कतार पुगेको थियो ।

कतारमा शुक्रबार साँझ भएको खेलमा २–२ को बराबरीमा टुंगिएको थियो ।
नेपाली यू २३ टोलीले दुई पटक सम्मको अग्रतालाई जोगाउन बराबरीमा चित्त बुझाएको थियो । नेपालका लागि अनन्त तामाङ र रेजिन सुब्बाले गोल गरेका थिए । म्यानमारका लागि दुवै गोल ल्विन मोइ औङले गोल गरेका थिए ।

नेपाल साग अन्तर्गत फुटबलको साविक विजेता हो । सन् २०१६ मा भारतमा भएको सागको १२ औं संस्करणको फाइनलमा आयोजकलाई हराउँदै नेपालले स्वर्ण पदक जितेको थियो ।
यू २३ टोलीमा उमेर भन्दा बढीका ३ खेलाडी राख्न पाउने प्रावधान अनुसार टोलीका मुख्य प्रशिक्षक बालगोपाल महर्जनले राष्ट्रिय टोलीका कप्तान किरण चेम्जोङसहित ५ खेलाडीलाई राखेका छन् । जसमा यू २३ का कप्तानी गरेको सुजल श्रेष्ठ, विक्रम लामा, नवयुग श्रेष्ठ र रोहित चन्द छन् ।

विदेशी लिगमा समेत रहेकाले किरण, रोहितसँगै यू २३ टोलीका विमल घर्तीमगरलाई यसपटक टोलीमा राखिएन । यी सिनियरमध्येबाट ३ खेलाडी सागका लागि अन्तिम छनोटमा पर्ने सम्भावना छ ।

व्यवासायिक फुटबलको जिम्मेवारीका लागि किरण भारत, रोहित इन्डोनेसिया र विमल माल्दिभ्समा रहेका छन् । साग मंसिर १५ देखि २४ गते सम्म काठमाडौं र पोखरामा आयोजना हुनेछ ।