सुबास हुमागाईं, काठमाडौं

रियल म्याड्रिड र ग्यारेथ बेलबीच पछिल्ला समय सम्बन्ध फेरी चिसिएको छ । विगत केहि सिजनयता नै बेल रियलका लागि टाउको दुखाइ बन्दै आएका छन् । अझ रोनाल्डोको प्रस्थानपछि निकै आशा गरिएका उनी कहिले चोट त कहिले प्रशिक्षकसँग समस्याका कारण लगातार टोलीमा रहेका छैनन् ।

यसै साता बेलले रियल म्याड्रिडलाई निराश बनाउने अर्को कार्य गरेका छन् । वेल्सले युरोपेली च्याम्पियनसिपमा छनोट हुने पक्का भएपछि केहि समर्थकले ल्याएको झन्डालाई बेलसहितका केहि खेलाडीले निकै रमाइलो ढंगले प्रस्तुत गरे । उक्त वेल्सको राष्ट्रिय झन्डामा लेखिएको थियो, ‘वेल्स, गल्फ, म्याड्रिड : इन द्याट अर्डर’ अर्थात बेलले आफ्नो लागि पहिला वेल्स, अनि गल्फ र त्यसपछि मात्र म्याड्रिडलाई आफ्नो सुचिमा राखेका छन् ।

सन् २०१३ मा विश्व कीर्तिमानी मूल्यमा रियल म्याड्रिड आएका बेलले क्लबका लागि निर्णायक प्रदर्शन पनि गरेका छन् । तर, समर्थकमाझ भने उनी यस्तै कार्यले गर्दा प्रिय हुन सकेका छैनन् । बेललाई लिएर समर्थकहरु दिन प्रतिदिन रुष्ट बन्दै गइरहेका छन् । यसपटक समर ट्रान्सफरमा बेल चीन जाने लगभग पक्का भइसक्दा अन्तिम समयमा प्रशिक्षकले उनलाई फिर्ता बोलाएका थिए ।

तर त्यसपछि प्रशिक्षक र उनीबीच राम्रो सम्बन्ध बन्न सकेको छैन । उनको पछिल्लो व्यवहारले जिदान पनि अब उनको पक्षमा नरहने लगभग पक्काजस्तो देखिएको छ । रियलका लागि कोपा डेल रे फाइनलमा गरेको जादुमयी गोल होस् या १३ औं उपाधि दिलाउन गरेको अद्भुत प्रदर्शन ।

समर्थकहरुका लागि बेललाई विशेष समर्थन गर्न थुप्रै क्षण छन् । तर उनले गरेको मैदानबाहिरको हर्कतले भने समर्थकहरुले यो सब बिर्सेका छन् । अहिलेको अवस्थामा लुका मोड्रीच, करीम बेन्जेमा, मार्सेलो जस्ता खेलाडीले क्लब छाडेमा उनीहरु समर्थकका नजरमा लेजेण्ड नै हुनेछन् । तर तुलनात्मक रुपमा बढी सफलताका कारण बनेका बेल भने ठिक विपरित हुनेछन् । उनले कहीले पनि समर्थकमाझ आफूलाई राम्रो देखाउने कार्य गरेनन् ।

रियलले पनि बेललाई आवश्यकता भन्दा बढी समय क्लबमा राखेको भान हुन थालेको छ । त्यसैले अब बेलको भविष्य रियलबाहिर नै रहेको प्रष्ट छ । चाहे त्यो समर्थकको लागि होस्, प्रशिक्षकको लागि होस् या उनी आफैंको लागि ।