काठमाडौं (हाम्रो खेलकुद) – भुटानले लिग चरणको अन्तिम खेलमा श्रीलंकालाई पराजित गर्दै १३ औं दक्षिण एसियाली खेलकुद (साग) को पुरुष फुटबलतर्फ फाइनलमा स्थान पक्का गरेको छ ।

भुटानले श्रीलंकामाथि ३-० को फराकिलो जित दर्ता गर्दै स्वर्ण भिडन्तमा स्थान पक्का गर्यो । भुटानले पहिलो हाफमा १ र दोस्रो हाफमा २ गोल गरेको थियो । भुटानका लागि खेलको १८ औं मिनेटमा छिमी दोर्जीले एकल प्रयासमा उत्कृष्ट गोल गर्दै अग्रता दिलाएका थिए ।

दोस्रो हाफको ६९ औं मिनेटमा भुटानले पेनाल्टीको अवसर पायो । दावा छिरिङले पेनाल्टीमा गोलरक्षकलाई गलत दिशामा पठाउँदै भुटानको अग्रता दोब्बर पारे । खेलको १० मिनेट समय बाँकी रहँदा यसी दोर्जीले पेनाल्टी क्षेत्रभित्र गोलरक्षकलाई चिप गर्दै भुटानको जित पक्का गरे । यससँगै भुटानले ४ खेलमा ९ अंकसहित शीर्षस्थानमा रहँदै फाइनलमा स्थान बनाएको हो ।

यसअघि नेपाल पनि माल्दिभ्सलाई २-१ ले पराजित गर्दै फाइनलनजिक पुगेको थियो । भुटानको जितले भने नेपालले अब अन्तिम लिग खेलमा बंगलादेशसँग कम्तिमा १ अंक जोड्नुपर्ने समीकरण आएको छ । बंगलादेशसँग पराजित भएको खण्डमा भने नेपाल प्रतियोगिताबाट बाहिरिनेछ ।

अंक तालिकामा भुटान ४ खेलमा ९ अंक जोड्दै शीर्षस्थानमा छ । नेपालको ३ खेलमा ७ अंक छ भने बंगलादेशको समान खेलमा ४ अंक रहेको छ । माल्दिभ्स र श्रीलंका ४ खेलमा २-२ अंक जोड्दै खालि हात फर्केका छन् ।