पोखरा (हाम्रो खेलकुद) – दोस्रो संस्करणको पोखरा प्रिमियर लिग टि ट्वान्टी क्रिकेट प्रतियोगिता अन्तर्गत शुक्रबारको पहिलो खेलमा बुटवल ब्लास्टर्सले साविक विजेता पोखरा पल्टनलाई ८ विकेटले हराएको छ ।

जितका लागि १ सय २२ रनको लक्ष्य बुटवलले १४ ओभरमा २ विकेट गुमाउँदै पुरा गर्यो । लगातार तेस्रो हारसँगै साविक विजेता पोखराको प्ले अफ पुग्ने संभावना अंक गणितीय झिनो आशा मात्रै बाँकी रहेको छ । अन्य टोलीको नतिजा आफु अनुकुल आएमा र अन्तिम खेलमा धनगढीमाथि फराकिलो जित निकाल्न सके पोखरा नाटकीय रुपमा प्ले अफ पुग्नसक्ने समिकरण रहन्छ ।

बुटवलको जितमा ओपनर ओपनर अफ्ताब उदीन अहमदले सर्वाधिक ७५ रनको योगदान दिए । १२ औं ओभरको अन्तिम बलमा राशिद खानले प्रथामेश दाकेबाट क्याच गराउनु अघि उनले ४६ बलमा १२ चौका र २ छक्का प्रहार गर्दै जित पक्का गरे ।

शंकर राना १९ रनमा बोल्ड आउट भए । रानालाई ११ औं ओभरको चौथो बलमा प्रथामेश दाकेले बोल्ड आउट गर्नुअघि २३ बलमा २ चौका प्रहार गरे । पहिलो विकेटका लागि अफ्ताब उदीन अहमद र शंकर रानाले ८७ रनको साझेदारी गरेपछि बुटवलको सहज जित पक्का बनेको थियो । भिम सार्की १० बलमा ३ चौका सहित १६ र हर्ष टोन्क ६ रनमा अविजित रहे । पोखराका हर्ष टोन्क र राशिद खानले १-१ विकेट लिए ।

त्यसअघि पोखरा रंगशालामा टस हारेर ब्याटिङ थालेको पोखराले २० ओभरमा ५ विकेट गुमाउँदै मात्र १ सय २१ रन बनाएको थियो। भारतीय ब्याट्सम्यान रविइन्दर सिंह ४२ बलमा २ चौका र २ छक्का सहित ४५ रनमा अविजित रहे । प्रथामेश दाके २० बलमा १ चौका र १ छक्का सहित २० रनमा नट आउट रहे । रविइन्दर र प्रथामेशले छैटौं विकेटका लागि अविजित ५२ रनको साझेदारी गर्दै इनिङ उकासेका थिए ।

पहिलो आभेरको दोस्रो बलमै ओपनर कुशल भुर्तेललाई ललित सिंह भण्डारीले शून्यमा एलबी डब्लू आउट गरे । चौथो ओभरको तेस्रो बलमा कप्तान शरद भेषावकरलाई हर्ष टोन्कले लङ अनमा विपिन खत्रीबाट ७ रनमा क्याच आउट गराएका थिए । छैटौं ओभरको तेस्रो बलमा हर्ष टोन्कले विकेटकीपर विनोद भण्डारीलाई अफ्ताब उदीन अहमदबाट ३ रनमा क्याच आउट गराए । आठौं ओभरको पाँचौ बलमा ओपनर इशान पाण्डेलाई शिवम सिंहले कप्तान सिद्धान्त लोहनीबाट १३ रनमा क्याच आउट गराए । उनले १९ बलमा १ चौका प्रहार गरे । १४ औं ओभरको दोस्रो बलमा नितेश थापाले रोहित कुमार पौडेललाई १९ रनमा बोल्ड आउट गरे । रोहितले १८ बलमा १ चौका र १ छक्का प्रहार गरे । बुटवलका हर्ष टोन्कले ४ ओभरमा १० रन खर्चेर २ विकेट लिए । ललितसिंह भण्डारी, शिवम सिंह र नितेश थापाले १–१ विकेट लिए ।

पोखराले पहिलो खेलमा काठमाडौं गोल्डेन्स वारियर्सलाई ९ विकेटले पराजित गर्दै उत्कृष्ट सुरुवात गरेको थियो । तर दोस्रो खेलमा चितवन राइनोजसँग ६ विकेटले र विराटनगर टाइटन्ससँग ४५ रनले पराजित हुन पुग्यो । आजको हारसँगै पोखराको लगातार तेस्रो हार हो ।

पहिलो खेलमा काठमाडौंलाई सुपर ओभरमा हराएको बुटवल दोस्रो खेलमा चितवन राइनोजसँग १ सय १९ रनले पराजित भएको थियो । पोखराले अन्तिम खेल सोमबार धनगढी ब्लुजसँग खेल्ने छ । बुटवलले चौथो खेलमा आइतबार धनगढीसँग खेल्ने छ ।