काठमाडौं (हाम्रो खेलकुद)– कतार एयरवेज सहिद स्मारक ए डिभजन लिगको बुधबारको खेलको पहिलो हाफको समाप्तीमा मछिन्द्र क्लबले फ्रेन्ड्स क्लबविरुद्ध १–० को अग्रता लिएको छ । २९ औं मिनेटमा पिटर सेगुनको गोलबाट मछिन्द्रले अग्रता लिएको थियो । रेजिन धिमालको क्रसलाई गोलकिपर देव लिम्बुले पन्च गर्दै फर्काएपनि त्यहि रिबाउन्डमा सेगुनले हेडमार्फत गोल गरेका थिए ।

स्टारहरुले भरिएको मछिन्द्रले गोल गर्ने केहि मौका चुकाएको थियो । २१औं मिनेटमा विशाल राईको फ्रिकिक गोलकिपर देव लिम्बुले उत्कृष्ट पञ्च गर्दै बचाए । २५औं मिनेटमा अभिषेक रिजालको हेडरले पोष्टको दिशा लिन सकेन । २७औं मिनेटमा एडिलाजा सोमिडेको प्रहार गोलकिपर देवले रोके । ३२औं मिनेटमा बुद्व चेम्जोङको प्रहार बाहिरियो ।

मछिन्द्रले अघिल्ला २ खेलमा १ जित र १ बराबरी निकालेको छ । ब्रिगेड ब्वाइज क्लबलाई २–० ले हराएको मछिन्द्र अर्को खेलमा च्यासल युथ क्लबसँग १–१ को बराबरीमा रोकिएको छ । गत वर्ष लिग अंक तालिकाको पुछारबाट दोस्रोमा रहेका कारण यसपटकको लिगबाट १ अंक घट्ने भएकाले मछिन्द्रको खातामा ३ अंक छ । फ्रेन्ड्सले भने अघिल्ला दुई खेलमा हार बेहोरेको थियो ।