काठमाडौं (हाम्रो खेलकुद)– त्रिभुवन आर्मी क्लबकी दिपा राई प्रधानसेनापति अन्तर्राष्ट्रिय महिला फुटबल प्रतियोगिताको सर्वोत्कृष्ट खेलाडी घोषित भएकी छिन् । उनले स्कुटर प्राप्त गरिन् । उपाधि भने एपिएफले जितेको छ । आर्मी क्लबलाई बुधबार २–० ले हराउँदै एपिएफ  पाँचौं पटक च्याम्पियन बनेको हो ।

एपिएफलाई जित दिलाउन सरु लिम्बु र रेखा पौडेलले गोल गरेका थिए । एपिएफले उपाधिसहित ३ लाख रुपैयाँ र आर्मीले १ लाख ५० हजार रुपैयाँ प्राप्त गर्यो । एपिएफकी सावित्रा भण्डारी प्रतियोगिताको उत्कृष्ट फरवार्ड घोषित हुँदा सोही टोलीकी अन्जली तुम्बाफो सुम्बा उत्कृष्ट गोलकिपर र जनक सिंह उत्कृष्ट प्रशिक्षक घोषित भए ।

आर्मीकी पुजा राना उत्कृष्ट रक्षक र भुटानको राष्ट्रिय टोलीकी पेमा छोडेन छिरिङ उत्कृष्ट मिडफिल्ड घोषित भइन् । उत्कृष्टले समान १० हजार रुपैयाँ प्रापत गरे । आर्मीकी विमला विके उदयीमान खेलाडी चुनिइन् । उनलाई सैनिक श्रीमती संघले २५ हजार ५ रुपैयाँबाट पुरस्कृत गर्यो । मंसिर २९ गतेबाट सुरु भएको प्रतियोगितामा ८ टोलीको सहभागिता थियो ।

प्रधानसेनापति अन्तर्राष्ट्रिय महिला फुटबल प्रतियोगिताका उत्कृष्ट

सर्वाेत्कृष्ट खेलाडी – दीपा राई (आर्मी )

उत्कृष्ट
गोलकिपर – अन्जली तुम्बाफो सुब्बा (एपिएफ)
रक्षक – पुजा राना (आर्मी)
मिडफिल्ड – पेमा छोडेन छिरिङ (भुटान)
फरवार्ड – सावित्रा भण्डारी (एपिएफ)
प्रशिक्षक – जनक सिंंह (एपिएफ)
उदयीमान खेलाडी – विमला विके (आर्मी)