काठमाडौं (हाम्रो खेलकुद) – राजधानीमा जारी कतार एयरवेज सहिद स्मारक ‘ए’ डिभिजन लिग अन्तरगत तेस्रो चरणको दोस्रो दिनको खेलमा आज (बिहीबार) दुई खेलमा प्रतिस्पर्धा हुदैछ ।

सातदोबाटोस्थित एन्फा कम्प्लेक्समा ब्रिगेड ब्वाइज क्लब (बीबीसी) र मनाङ मस्याङ्दी क्लब मध्यान्ह १२ बजे तथा दशरथ रंगशालमा दिउँसो ३ संकटा क्लब र जावलाखेल युथ क्लबबीच प्रतिस्पर्धा हुँदैछ ।

गतवर्षको विजेता समेत रहेको मनाङ बीबीसीलाई पराजित गर्दै शीर्षस्थानमा फर्कने लक्ष्यमा हुनेछ । अपराजित रहेको मनाङको दुई खेलबाट ६ अंक रहेको छ । गोलअन्तरमा दोस्रो स्थानमा छ । अघिल्लो वर्ष लिग जित्दाका अधिकांश खेलाडीले क्लब छाडेपनि मनाङले आफ्नो पुरानो छविलाई निरन्तरता दिदै लगातार दोस्रो जित निकाल्न सफल भएको छ । त्यसैलाई मनाङ निरन्तरता दिने लक्ष्यमा मैदान उत्रने छ ।

मनाङले यसअघि भएको पहिलो खेलमा एपीएफलाई २–० तथा आर्मीलाई १–० गोल अन्तरले पराजित गरेको थियो । गत सिजनको खेलमा मनाङविरुद्व अप्रत्यासित अग्रता लिएको ब्रिगेडले अन्तिममा खेल ३–१ ले गुमाएको थियो । सोही कारण ब्रिगेडसंग मनाङ सचेत भएर खेल्नेछ ।

यता, युवा र केही अनुभवी खेलाडीको टिम बीबीसी पनि मनाङलाई स्तब्ध पार्दै ३ अंक जोड्ने दाउमा हुनेछ । राष्ट्रिय टिमका पुर्व कप्तान समेत रहेको अनिलले लामो समय मनाङको जर्सीमा घरेलु फुटबलमा प्रभाव जमाएका थिए । उनै अनिलको कप्तानीमा रहेको ब्रिगेड घरेलु फुटबलको महारथी क्लब मनाङलाई कडा टक्कर दिने लक्ष्यमा छ ।

ब्रिगेडले मछिन्द्रलाई २–० ले नतिजा सुम्पिएको थियो । दोस्रो खेलमा फ्रेन्ड्सलाई २–० ले हराएको थियो । ब्रिगेड एक जित र एक हारसहित ३ अंक बटुलेको छ ।

दिनकै अर्काे खेलमा जावलाखेल र संकटाबीच प्रतिस्पर्धा हुनेछ । जावलाखेल अपराजित यात्रालाई निरन्तरता दिने दाउँमा हुनेछ । थ्रीस्टारसँग पहिलो खेलमा अंक खोस्न सफल जावलाखेलले दोस्रो खेलमा सरस्वती युथ क्लबलाई पराजित गरको थियो । च्यासलसँग २–० पराजित भएको संकटाले दोस्रो खेलमा एनआरटीलाई १–० ले पराजित गरेको थियो ।

जावलाखेलको २ खेलबाट ४ अंक छ । संकटाको २ खेलबाट ३ अंक छ ।