काठमाडौं (हाम्रो खेलकुद) – एन्फा कम्प्लेक्समा बिहीबार मनाङ मर्स्याङ्दी र ब्रिगेड ब्वाइज क्लब (बीबीसी) बीचको खेलमा मनाङका डिफेन्डर एकराज बुढाथोकीले विजय गुरुङमाथि फल गरे । ५०-५० बलमा बलमा प्रहार गर्न खोज्दा एकराजको बुटले विजयको टाउको भेट्यो र विजय ढले । रेफ्री कविन ब्यन्जन्कारले एकराजलाई रातो कार्ड दिए र केहि डरलाग्दो अवस्थामा देखिएका विजयको उपचारका लागि डाक्टरहरु तुरुन्त आइपुगे ।

रेफ्रीले रातो कार्ड देखाउँदा न कुनै मनाङका खेलाडीले विरोध गरे त न खुद कार्ड खाने एकराजले नै । खेलदौरान हुने दुर्भाग्यपूर्ण घटना थियो त्यो । तर मैदानभित्र उक्त घटना हुँदा मैदानबाहिर भने अर्को घटना भयो । रंगशालामा देखिने मनाङकी एक नियमित समर्थकले विजय ढल्नबितिकै निकै खराब शब्द प्रयोग गरिन् । त्यतिमात्र होइन, उनले ‘त्यो मरेपनि हुन्छ!’ भने पटक पटक भन्न भ्याइन् । वरपर रहेका समर्थकले उनलाई चुप लाग्न भने । एन्फाले तैनाथ गरेको सुरक्षा दस्ताले पनि उनलाई चुप लाग्न भन्यो । तर उनले स्थितिलाई अझ उग्र बनाइन् ।

विकल्प नदेखेपछि सुरक्षा दस्ताले उनलाई निकाल्नुको विकल्प नै रहेन । मनाङको खेलमा नियमित उपस्थित रहने उनको रवैया एक फुटबल समर्थकका लागि लज्जास्पद नै रहने गर्दछ । मनाङको विपक्षी खेलाडीलाई उनले हरेक खेलमा खराब नियतको शब्द प्रयोग गर्दै आएकी छिन् । मनाङकै पूर्व खेलाडी हुँदा त झन् उनको प्रस्तुतिले छेउछाउ बसेका दर्शक नै लाजले पर सर्छन् । बिहिबारको खेलमा उनले विजयविरुद्ध गरेको प्रस्तुतिपछि खेलाडीले बेलुका भिडियो संदेश नै दिए ।

राजधानीको दशरथ रंगशाला र एन्फा कम्प्लेक्समा कतार एअरवेज सहिद स्मारक ए डिभिजन लिग सुरु भएको दुई साता बितिसकेको छ । यसक्रममा लिगको तेस्रो चरणको खेल पनि सकिन आँटेको छ । लिगको १८ खेल सकिँदा एकै खेलमा सर्वाधिक दर्शक संख्या ९ सय २ जना छ । विगतमा ठूलो संख्यामा दर्शकको उपस्थिति रहने मनाङ र आर्मीको खेल हेर्न जम्मा ७ सय दर्शक मैदान पुगे ।

अखिल नेपाल फुटबल संघ (एन्फा) ले लिगका दौरान रंगशालामा समर्थकको उपस्थिति बढाउने लक्ष्यसहित केहि दिन अघिमात्र ‘विशेष प्याकेज’ घोषणा गर्यो । भाग्यमानी दर्शकले राष्ट्रिय फुटबल टोलीसँग विदेश भ्रमणसम्मको अवसर पाउने उक्त प्याकेजसँगै दर्शक सहभागिता बढ्ने एन्फाको अपेक्षा थियो । हालसम्म लिगको प्रचार प्रसारमा शून्यप्राय देखिएको एन्फाको यो प्रयासले कति सफल पाउँछ, त्यो समयले बताउला । तर समर्थकको उपस्थिति भन्दापनि कस्ता समर्थक खेल हेर्न आएका छन् भन्नेमा भने एन्फाको ध्यान गएको छैन ।

साविक विजेता मनाङ मर्स्याङ्दी, रुस्लान थ्री स्टार, च्यासल र विभागीय टोलीका खेलमा तुलनात्मक रुपमा बढी समर्थन आउने गर्छन् । यसबाहेक ललितपुर र काठमाडौंका अन्य क्लबका खेलमा पनि सिमित दर्शक नियमित नै हुने गर्दछन् । खेल हेर्न दर्शक संख्या यति कम हुन्छन् की खेलाडीले पनि समर्थकलाई राम्रोसँग चिन्छन् । नेपालको खेलाडी बजार सानो छ । यसकारण थुप्रै खेलाडी वर्षपिछे क्लब परिवर्तन गर्न बाध्य हुन्छन् । यस्तो अवस्थामा खेलाडीप्रति लक्षित खराब बोलीले खेलाडीको मनोबल मात्र होइन खेलको वातावरण नै फोहोर बनाएको छ ।

राष्ट्रिय फुटबल टोलीका पूर्वकप्तान तथा ब्रिगेड ब्वाइज क्लबका कप्तान अनिल गुरुङले पनि दर्शकहरुको यस्तो व्यवहारले निकै दुखी बनाएको बताए । ‘हामीले मैदान छिरेपछि कतिपय अवस्थामा विपक्षी टोलीको दर्शक-समर्थकबाट निकै खराब कुरा सुन्नुपर्छ । मैदानमा ध्यान दिने भन्दापनि यस्तो कुराले निकै असर पर्छ । सकेसम्म ध्यान नदिने प्रयास हुन्छ तर कम समर्थक हुँदा धेरैले त्यो सुन्नुपर्छ । यस्ता खराब कार्य गर्नेलाई कारवाही गर्नपर्छ,’ उनले भने ।

एन्फा महासचिव इन्द्र्माना तुलाधरका अनुसार मैदानमा दर्शकदिर्घाबाट कुनै किसिमको नकारात्मक कार्य भए एन्फाले कारवाही गर्ने बताउँछन् । ‘हामीले बिहीबारको घटनाबारे विस्तृत बुझ्न बाँकी छ । एन्फाले केहि गलत भएमा दर्शकमाथि पनि प्रतिबन्ध लगाउनेछ । हामीले गल्ति भएको पुष्टि भएमा रंगशाला प्रतिबन्धसम्म गर्न सक्छौं ,’ उनले भने ।