काठमाडौं (हाम्रो खेलकुद)- त्रिभुवन आर्मी क्लबले कतार एयरवेज सहिद स्मारक ए डिभिजन लिगमा दोस्रो जित हात पारेको छ। शुक्रवार सातदोबाटोस्थित एन्फा मैदानमा भएको खेलमा आर्मीले हिमालयन शेर्पालाई २–० ले पाखालगाउँदै जित निकालेको हो।
जितसँगै आर्मीले ३ खेलबाट ६ अंक जोडेको छ। खेलको पहिलो हाफ गोलरहित बराबरीमा सकिएको खेलमा दुवै गोल दोस्रो हाफमा भएको थियो। आर्मीको जितमा कप्तान भरत खवास र टेक बहादुर बुढाथोकीले गोल गरे। खेलको म्यान अफ दि म्याच भरत खवास बने।
दोस्रो हाफमा शेर्पाले १२ खेलाडी मैदानमा उतारेपछि खेल केहीवेर अवरुद्व भएको थियो । शेर्पाका विसन गुरुङ सब्सिच्युटविनै मैदान प्रवेश गरेपछि खेल केहि समय अबरुद्ध हुन पुगेको थियो । ५७ औं मिनेटमा कप्तान भरत खवासले गोल गर्दै आर्मीलाई अग्रता दिलाए । डिफेन्डर आशिष गुरुङलाई बिट गर्दै गोलकिपर किशोर गिरी अघि बढेको अवस्थामा भरतको चिप भली प्रहार गोलमा परिणत भएको थियो ।
६१औं मिनेटमा टेक बहादुर बुढाथोकीले गोल गर्दै आर्मीको अग्रता दोब्बर पारे । डिफेन्डर अलरिच सिवेले राम्रो सँग क्लियर गर्न नसकेको बललाई टेक बहादुरले गोल गर्न सफल भएका थिए । लगत्तै दिनेश हेन्जनको क्रस पासमा भरतको प्रहार डिफेन्डर निरज बस्नेतले गोललाईन नजिकबाट क्लियर गरिदिए ।
पहिलो खेलमा आर्मीले फ्रेन्डस् क्लबलाई २–१ गोल अन्तरले हराएको थियो। दोस्रो खेलमा साविक विजेता मनाङसँग १–० ले पराजित भएको थियो। शेर्पाले भने ३ खेलबाट २ अंक जोडेको छ। पहिलो खेलमा नेपाल पुलिससँग गोलरहित बराबरी गरेको शेर्पाले दोस्रो खेलमा एपीएफसँग १–१ गोलको बराबरी खेलेको थियो ।
आजै दिउँसो ३ बजे दशरथ रंगशालामा अर्काे विभागीय टोली नेपाल पुलिस क्लब र सरस्वती युथ क्लबबीच प्रतिस्पर्धा हुदैछ।
