काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिगमा आज (मंगलबार) चौथो चरणको खेल अन्तरगतको दोस्रो दिन दुई खेल हुँदैछन् ।

सातदोबाटोस्थित एन्फा कम्प्लेक्समा मंगलबार पहिलो खेलमा च्यासल युथ क्लब र जावलाखेल युथ क्लब तथा दोस्रो खेलमा हिमायलन शेर्पा र ब्रिगेड ब्वाईज क्लब (बीबीसी) बीच प्रतिस्पर्धा हुनेछ । खेल बिहान साढे ११ बजे र ३ बजे हुनेछ । अपराजित रहेको जावलाखेल र उपाधि दावेदार टोलीको रुपमा रहेको च्यासलबीचको खेल निकै रोमाञ्चक र प्रतिस्पर्धात्मक हुने अपेक्षा गरिएको छ ।

उपाधि होडलाई कायमै राख्न च्यासललाई जावलाखेलविरुद्धको खेलमा जित निकाल्नुपर्नेछ । च्यासल ३ खेलबाट ४ अंक जोडेर आठौं स्थानमा रहेको छ । जावलाखेललाई पराजित गरे च्यासल ७ अंक जोडेर तेस्रो स्थानमा उक्लनेछ । तीन जापानी खेलाडीको साथ पाएको च्यासलसँग आधुनिक नेपाली फुटबलका गोल मेसिन सन्तोष साहुखलको पनि साथ छ । सन्तोष लिगमा १ सयौं गोलको संघारमा छन् । मंगलबार जावलाखेलविरुद्ध गोल गर्न सफल भए सन्तोष लिगमा १ सय गोल गर्ने पहिलो खेलाडी बन्नेछन् । टोलीका लागि उनी नै मुख्य हतियार हुनेछन् ।

च्यासलले पहिलो खेलमा संकटालाई २–० ले पराजित गरेको च्यासल दोस्रो खेलमा मछिन्द्रसँग १–१ गोलको बराबरी खेल्दा एनआरटीसँग २–१ ले पराजित भएको थियो । यता, लयमा रहेको जावलाखेल च्यासललाई पराजित गर्दै अपराजित यात्रालाई निरन्तरता दिने योजनामा मैदानमा उत्रनेछ । जावलाखेलले थ्रीस्टार र संकटालाई बराबरीमा रोक्न सफल हुदा सरस्वतीलाई पराजित गरेको थियो ।

तीन खेलबाट ५ अंक जोडेर जावलाखेल पाँचौं स्थानमा रहेको छ । जावलाखेलले च्यासलविरुद्ध प्रतिबन्धका कारण मिडफिल्डर ड्याडी जुनियर वाम्वालाई गुमाउने छ । तर, जावलाखेलले दक्षिण एसियाली राष्ट्रको खेलाडीको रुपमा भारतका युवा खेलाडी कुवेरलाई अनुबन्ध गरेको छ । सम्भवत उनी च्यासलविरुद्धको खेलमा उत्रनेछ ।

१ सयौं लिग खेल खेल्दै बीबीसी

‘ए’ डिभिजन लिगमा १ सयौं खेलमा ब्रिगेड ब्वाइज (बीबीसी) ले यति हिमालयन शेर्पा क्लबको सामना गर्दैछ । खेल दिउसो ३ बजेपछि एन्फा कम्प्लेक्स सातदोबाटोमा हुनेछ । बीबीसी २०६१ सालमा पहिलोपटक ‘ए’ डिभिजनमा बढुवा भएो थियो । त्यसयता बीबीसीले निरन्तर ‘ए’ डिभिजन लिग खेलिरहेका छन् ।

बीबीसी आफ्नो १ सयौं खेललाई सुखद बनाउने लक्ष्यमा हुनेछ । लिगको पहिलो खेलमा मछिन्द्रसँग २–० ले पराजित बीबीसीले दोस्रो खेलमा फ्रेण्ड्सलाई २–० ले नै राजित गरेको थियो । मनाङसँग १–० गोल अन्तरले पराजित बनेको थियो । मनाङविरुद्धको खेलमा चोट बोकेका विजय गुरुङ खेल्नेमा अनिश्चित छ । विजयको टाउकोमा ६ टाका लगाइएको छ ।

यता, हिमालयन शेर्पा क्लब पहिलो जितको खोजीमा हुनेछ । पहिलो र दोस्रो खेलमा विभागीय एपीएफ र पुलिससँग बराबर खेलेको शेर्पा तेस्रो खेलमा भने आर्मीसँग २–० गोल अन्तरले पराजित भएको थियो । लिगमा बीबीसी १०औं स्थानमा र शेर्पा ११औं स्थानमा छ ।