काठमाडौं (हाम्रो खेलकुद)– परिवार, साथीभाई र परिवारसँग भविष्यमा कहिल्यै निराश नपार्ने वचनसहित त्रिभुवन आर्मी क्लबका सन्तोष तामाङ बुधबार कतार एयरवेज सहिद स्मारक ए डिभिजन लिगमार्फत घरेलु फुटबलमा पुनरागमन गर्दैछन् ।

अनुशासन उल्लघंनका कारण अन्य ३ खेलाडीसहित ४५ दिन फुटबलबाट निलम्बनमा परेका सन्तोष आजबाट खेल्न पाउने भएका छन् । उनी रुस्लान थ्री स्टार क्लबविरुद्ध हुने खेलमा पहिलो रोजाईबाट खेल्ने आर्मीका प्रशिक्षक नवीन न्यौपानेले जानकारी दिए ।

उनीसँगै राष्ट्रिय टोलीका अन्य सदस्य विमल घर्ती मगर, अन्जन विष्ट र दीनेश राजवंशीलाई अखिल नेपाल फुटबल संघ (एन्फा) ले निलम्बन गर्नुका साथ जनही ५० हजार रुपैयाँ जरिवाना गरेको थियो । सन्तोष र अन्जनलाई ४५ दिन तथा विमल र दीनेशलाई भने ९० दिन प्रतिबन्ध लगाइएको थियो । सन्तोष र अन्जनको निलम्बन मंगलबार फुकुवा भएको हो ।

कुवेतविरुद्ध विश्व कप छनोट खेल्नेका लागि भुटान जानु अघिल्लो दिन राती अबेर सम्म डिस्कोमा बसेपछि एन्फाले उनीहरुमाथि कारवाही गरेको थियो । कात्तिक ३० गते टोलीका साथ भुटान जानका लागि विदाई कार्यक्रममा भाग लिन एन्फा कम्प्लेक्स पुगेका उनीहरु कारवाहीमा परेपछि घर फर्केका थिए ।

त्यसपछि उनीमाथि एन्फाले मंसिर २७ गते ९० र ४५ दिनको कारवाही गरेको थियो । पछि चारै जनाले कारवाही घटाउनका लागि अपिल गरेपछि एन्फाले कात्तिक ३० गतेबाट नै कारवाही लागुको निर्णय सुनाएका थियो । पुरानै मितिबाट कारवाहीको निर्णय भएपनि सन्तोष र अन्जनले चाँडै लिग खेल्न पाउने भएका हुन् । विमल र दीनेशले भने अझै डेढ महिना कुर्नुपर्नेछ ।

‘कमब्याक गर्न पाउँदा निकै खुसी छु । त्यसमाथि अंगे्रजी नयाँ वर्षकै दिन फुटबलमा फर्कदैछु । त्यो घटनाले मेरो जीवनमा निकै असर गरेको छ । परिवार , साथीभाई, समर्थक सबैले नराम्रो सोच्नुभयो,’ उनले भने,‘ मैले सबैको चित्त दुःखाए । त्यसमा अहिले सम्झदा पनि नराम्रो लाग्छ ।’

उनले त्यो घटनालाई एउटा पाठका रुपमा लिएर भविष्यमा गल्ति नदोहाराउने वचन दिएका छन् । ‘कुनै पनि घटनाले केहि न केहि पाठ सिकाउँछ । मैले पनि ठूलो पाठ सिकेको छु,’ उनले थपे,‘ म सबैसँग माफि माग्न चाहन्छु । आउने दिनमा फेरि यस्तो गल्ति दोहाराउने छैन । तपाईहरुले हिजो जसरीनै साथ दिनुहुनेछ भन्ने आशा छ । आउने दिनमा आफ्नो खेलका बाध्यमबाट तपाईहरुलाई खुसी पार्ने कोशिस गर्नेछु ।’

फेन्ड्स क्लबबाट घरेलु फुटबल सुरु गरेका सन्तोष छ वर्षदेखि आर्मीको मुख्य सदस्यका रुपमा रहेका छन् । उनीलाई योहान कालिनले राष्ट्रिय टोलीबाट मौका दिएका थिए । उनको पुनरामगनले आर्मीको मिडफिल्ड बलियो हुने प्रशिक्षक नवीन न्यौपानेको विश्वास छ ।

‘हाम्रो टिममा सबै खेलाडीको ब्याकअप त छ । तर, सन्तोष हुनु र नहुनुले फरक त पर्छ नै ,’ न्यौपानेले भने,‘ मिडमा बल सप्लाईमा हाम्रो समस्या देखिएको छ । सन्तोषको पुनरागमनले सम्भवत त्यो ठाँउ पूर्ति हुनेछ ।’ उनले थ्री स्टारविरुद्ध लगायतका बलिया क्लबसँग राम्रो नतिजा निकाल्न नसके उपाधि अभियान कठिन हुने बताएका छन् ।

‘ मनाङ मस्र्याङ्दी क्लबसँग आफ्नै गल्तिले हार्यौं । त्यसले हामीले सचेत भएर खेल्नुपर्छ,’ उनले भने,‘ उपाधिका लागि जुन टोलीहरुसँग बढी प्रतिस्पर्धाको सम्भावना छ । ती टोलीसँग राम्रो नतिजा निकाल्नै पर्छ । नत्र हामी उपाधि दौडमा रहन कठिन हुन्छ । आजको खेलमा हामी राम्रो नतिजा लिने योजनासहित उत्रनेछौं ।’

थ्री स्टारका पुरानै अवस्थामा नरहेपनि कमजोर आक्ने गल्ति भने नगर्ने न्यौपानेले सुनाए । ३ मध्ये आर्मीले २ खेल जितेको छ भने थ्री स्टारले ३ खेलमा २ जित र १ मा बराबरी गरेको छ ।