एजेन्सी – क्रिस्टियानो रोनाल्डो र लिओनेल मेस्सीले पछिल्लो एक दशकमा विश्व फुटबलमा वर्चस्व नै जमाएका छन् । विश्व फुटबलमा यी दुईले एकपछि अर्को कीर्तिमान तोड्दै आफ्नो नाम लेखाउँदै आएका छन् ।

सन् २०२० मा पनि यी दुवै खेलाडी सोहि लयलाई निरन्तरता दिने सुरमा हुनेछन् । दुवै टोली च्याम्पियन्स लिगमा उपाधिका दावेदारका रुपमा दरिएका छन् भने आ-आफ्नो घरेलु लिग उपाधि पनि रक्षा गर्न चाहन्छन् । दुवै खेलाडीसँग क्लब तथा अन्तर्राष्ट्रिय फुटबलमा नयाँ कीर्तिमान रच्ने अवसर छ ।

हाल मेस्सीको बार्सिलोना ला लिगामा २ अंकले अगाडी छ भने उनले पछिल्लो १० खेलमा ११ गोल गर्दै नयाँ वर्षमा प्रवेश गर्दा उच्च लयमा रहेको संकेत दिएका छन् । रोनाल्डो पनि पछिल्ला ४ लिग खेलमा ५ गोल गर्दै उत्कृष्ट लयमा रहेको बुझ्न सकिन्छ ।

उमेरको हिसाब गर्दा रोनाल्डो मेस्सीभन्दा २ वर्षले जेठा छन् । तर खेल्ने शैली र मैदानमा फिटनेस हेर्दा दुवैमा फरक देखिन्न । यस वर्ष पनि दुवै खेलाडीले विश्व फुटबलमा सफलता हासिल गर्दै अनेक कीर्तिमान रच्ने अपेक्षा गर्न सकिन्छ । केहि यस्ता विशेष कीर्तिमान जुन यी दुईले यस वर्ष तोड्न सक्छन् :

रोनाल्डो : युरोपेली कपमा सर्वाधिक जित

रोनाल्डोले रियल म्याड्रिडबाट खेल्दा सन् २०१८ को फाइनलमा लिभरपुललाई पराजित गर्दै पाँचौ पटक च्याम्पियन्स लिग उपाधि जितेका थिए । उनले म्यानचेस्टर युनाइटेडबात एक र रियलबाट ४ पटक च्याम्पियन्स लिग जितेका छन् । सन् २०२० मा युभेन्टसबाट खेल्दा रोनाल्डोको नजर अर्को दुर्लभ कीर्तिमानमा हुनेछ ।

रोनाल्डोले छैटौं पटक च्याम्पियन्स लिग उपाधि जितेमा फ्रान्सिस्को जेन्टोको कीर्तिमान बराबरी गर्नेछन् । उनले सन् १९५६ देखि १९६६ को बिचमा रियल म्याड्रिडबाट खेल्दै उक्त सफलता हासिल गरेका थिए । यसका लागि रोनाल्डोले च्याम्पियन्स लिगमा आफ्नो पुरानै लाय कायम गर्नुपर्ने हुनेछ ।

मेस्सी : एकै टोलीका लागि सर्वाधिक गोल

मेस्सीले आफ्नो फुटबल करीअरको सुरुवाती दिनदेखि नै बार्सिलोनाबाट खेले । यसक्रममा उनले लगातार सिजनमा गोल गर्दै विभिन्न कीर्तिमान आफ्नो नाम गरेका छन् । मेस्सी अब विश्व फुटबलका सर्वकालीन महान खेलाडीको रुपमा हेरिएका पेलेको किर्तिमान बराबरी गर्ने नजिक छन् । त्यो हो एकै क्लबबाट सर्वाधिक गोल गर्ने कीर्तिमान ।

पेलेले ब्राजिलियन क्लब सान्तोसका लागि खेल्दै ६ सय ४३ गोल गरेका थिए । मेस्सी अब उक्त कीर्तिमान आफ्नो नाम गर्नबाट जम्मा २६ गोल टाढा छन् । मेस्सीको ले हेर्दा उनले सन् २०२० को मध्यतिर नै उक्त कीर्तिमान आफ्नो नाम गर्ने देखिन्छ । यतिमात्र हैन मेस्सीले आउने दिनमा उक्त कीर्तिमानमा बलियो अन्त्य पनि गर्ने अपेक्षा गरिएको छ ।

रोनाल्डो : युरोपेली च्याम्पियनसिपमा सर्वाधिक गोलकर्ता

रोनाल्डोले राष्ट्रिय टोलीका लागि पनि पछिल्लो समय सफलता हासिल गर्दै आएका छन् । सन् २०१६ मा टोलीको कप्तानी सम्हाल्दै युरोपेली च्याम्पियनसिप दिलाएका उनले सन् २०१९ मा यूईएफए नेसन्स कपको उपाधि पनि दिलाए । हालसम्म रोनाल्डोले २००४, २००८, २०१२ र २०१६ गरेर चार पटक युरोपेली च्याम्पियनसिपमा सहभागिता जनाएका छन् ।

रोनाल्डोले यसक्रममा युरोपेली च्याम्पियनसिपमा ९ गोल गरेका छन् । उनी सर्वाधिक गोल गर्ने सुचिमा फ्रान्सका मिचेल प्लाटिनिसँग बराबरीमा छन् । सन् २०२० मा हुने युरोपेली च्याम्पियनसिपमा एक गोल मात्र गरेपनि रोनाल्डोको नाममा कीर्तिमान हुनेछ ।

मेस्सी र रोनाल्डो : च्याम्पियन्स लिगमा सर्वाधिक ह्याट्रिक

घरेलु लिगमा लगातार दवदवा कायम गर्दै आएका मेस्सी र रोनाल्डोको प्रतिस्पर्धा च्याम्पियन्स लिगमा पनि देखिंदै आएको छ । विगतमा एकै लिगमा खेल्दै आएका यी दुई अहिले फरक लिगमा खेलेपनि च्याम्पियन्स लिगमा भने आमने-सामने हुने सम्भावना रहेको छ । दुवै खेलाडीको हालको मुख्य लक्ष्य च्याम्पियन्स लिग जित्नु नै रहेको छ ।

मेस्सी र रोनाल्डो दुवै खेलाडीले हालसम्म च्याम्पियन्स लिगमा ८-८ पटक ह्याट्रिक गरेका छन् । यो नै प्रतियोगिता इतिहासमा सर्वाधिक संख्या पनि हो । सन् २०२० मा च्याम्पियन्स लिगको नकआउट चरण सुरु हुनेछ । त्यसपछि अर्को सिजनको समूह चरण पनि छ । यसक्रममा दुवै खेलाडीको नजर सर्वाधिक ह्याट्रिक गर्ने कीर्तिमान आफ्नो नाम लेखाउने लक्ष्य रहने देखिन्छ ।

रोनाल्डो : तीन लिगमा सर्वाधिक गोलकर्ता

क्रिस्टियानो रोनाल्डो म्यानचेस्टर युनाइटेडबाट खेल्दै इंग्लिस प्रिमियर लिगको उपाधि जित्दा लिगको सर्वाधिक गोलकर्ता समेत भएका थिए । त्यसपछि स्पेनिस क्लब रियल म्याड्रिड पुगेका उनले लिग उपाधि त जिते नै, सँगसँगै उक्त लिगमा समेत सर्वाधिक गोलकर्ताको उपाधि हासिल गरे । गत सिजन युभेन्टस पुगेका उनको अब इटालियन लिगमा समेत उक्त उपाधि हासिल गर्ने लक्ष्य छ ।

रोनाल्डोले जारि लिगमा १० गोल गरेका छन् । उनी सर्वाधिक गोलकर्ता सूचिको चौथो स्थानमा छन् । उनीभन्दा अगाडी जोआओ पेड्रो (११), रोमेलु लुकाकु (१२) र चिरो इम्मोबिले (१७) गोल सुचिमा छन् । रोनाल्डोले सन् २०२० मा युभेन्टसबाट सर्वाधिक गोलकर्ता बनेको खण्डमा तीन लिगमा उक्त उपाधि हासिल गर्ने पहिलो खेलाडी बन्नेछन् ।

मेस्सी : सातौं ब्यालोन डी’ओर

सन् २०१९ को ब्यालोन डी’ओर अवार्डमा लिओनेल मेस्सीले छैटौंपटक उपाधि हासिल गरे । उक्त कार्यक्रममा उनका चिर परिचित प्रतिद्वन्द्वी क्रिस्टियानो रोनाल्डो भने उपस्थित थिएनन् । रोनाल्डो र मेस्सी अघिल्लो वर्षसम्म ५-५ उपाधिमा बराबर थिए ।

सन् २०२० मा मेस्सीसँग रोनाल्डोलाई उछिन्ने अर्को अवसर छ । यस वर्ष मेस्सीले फेरी एकपटक ब्यालोन डी’ओर उपाधि जिते सातौं उपाधि हुनेछ । रोनाल्डोभन्दा २ उपाधि बढी जितेको खण्डमा रोनाल्डोले उनलाई उछिन्न लगभग असम्भव देखिन्छ ।

रोनाल्डो : अन्तर्राष्ट्रिय फुटबलको सर्वाधिक गोलकर्ता

पछिल्लो दशकमा पोर्चुगलले अन्तर्राष्ट्रिय फुटबलमा सफलता हासिल गर्दा कप्तान क्रिस्टियानो रोनाल्डोको गोल महत्त्वपूर्ण रहयो । टोलीको सफलतासँगै रोनाल्डोले व्यक्तिगत रुपमा पनि आफूलाई प्रमाणित गरे । अब रोनाल्डोको सामुन्ने अर्को दुर्लभ इतिहास आफ्नो नाम गर्ने अवसर छ ।

रोनाल्डोले पोर्चुगलका लागि अन्तर्राष्ट्रिय फुटबलमा ९९ गोल गरिसकेका छन् । शतकको संघारमा रहेका उनले अब सन् २०२० मा विश्व फुटबलकै सर्वाधिक गोलकर्ता बन्ने कीर्तिमानमा नजर राखेका छन् । इरानका अली दाइको नाममा रहेको १ सय ९ गोलको कीर्तिमान रोनाल्डोले यस वर्ष तोड्ने आँकलन गरिएको छ ।

मेस्सी : लगातार चौथो युरोपेली गोल्डेन बुट

बार्सिलोनाको सफलतामा नायक रहँदै आएका कप्तान लिओनेल मेस्सीले पछिल्लो तीन सिजन नै युरोपको सर्वाधिक गोलकर्ताको उपाधि आफ्नो नाम गरेका छन् । यस सिजन पनि उनी ला लिगाको सर्वाधिक गोलकर्ताको रुपमा १३ गोल गरिसकेका छन् । बार्सिलोनाले लिग उपाधि रक्षा गर्ने हो भने उनको भूमिका निर्णायक हुने देखिन्छ ।

युरोपमा सर्वाधिक गोलकर्तालाई प्रदान गरिने गोल्डेन बुट मेस्सीले लगातार तीन पटक जिते । हालसम्म मेस्सीबाहेक अन्य खेलाडीले यो कीर्तिमान रचेका छैनन् । सन् २०२० मा पनि मेस्सीले यो कीर्तिमान हासिल गरेको खण्डमा लगातार चौथो गोल्डेन बुट जित्ने उनी एक्ला खेलाडी हुने नै छन् । साथसाथै यस कीर्तिमान तोड्न सायदै अन्य खेलाडीले सक्नेछन् ।

पछिल्लो दशक विश्व फुटबलमा राज गरेका यी दुई खेलाडीलाई नयाँ दशकको सुरुवातमा पनि दुर्लभ कीर्तिमान रच्ने अवसर छ । तपाईंको बिचारमा यी दुईमध्य कसले माथि दिइएको कीर्तिमान पूरा गर्न सक्लान्, हाम्रोखेलकुदको फेसबुकमा कमेन्ट प्रतिक्रिया दिनुहोस् ।