काठमाडौं (हाम्रो खेलकुद) – उमेर समूहको राष्ट्रिय टोलीमा नेपालको प्रतिनिधित्व गरिसकेका फरवार्ड शिव सुवेदीले राजधानीमा जारी कतार एअरवेज सहिद स्मारक ए डिभिजन लिगमा रुस्लान थ्री स्टारबाट खेल्ने भएका छन् ।

नेपालले सन् २०१६ मा साफ यू-१९ च्याम्पियनसिप जित्दा टोलीका सदस्य रहेका शिव एन्फा एकेडेमीका उत्पादन हुन् । विमल घर्तिमगर, अनन्त तामाङ, अन्जन विष्ट लगायत खेलाडीको ब्याचका शिव पछिल्लो समय भारतमा थिए । उनी यू-१९ उमेर समूहको फुटबल खेलेपछि भारतीय आर्मीमा भर्ति भएका थिए । उनले २०७२ सालको राष्ट्रिय लिग भने सुदूरपश्चिम फुटबल क्लबबाट खेलेका थिए । त्यसबेला १० खेलमा सुरुवात गर्दै उनले २ गोल समेत गरेका थिए ।

शिव भारतीय आर्मीमा भर्ति भएको झन्डै ३ वर्ष भएको छ । उनले त्यहाँ रहेर पनि फुटबल नै खेल्ने गर्दछन् । शिवसँगै उनको ब्याचका फरवार्ड जनोममान लिगल, डिफेन्डर सुदन थापा तथा अर्का ब्याचका डिफेन्डर लक्ष्मण परियार सबै सँगै खेल्ने गर्दछन् । भारतीय आर्मीमा भएपनि यी सबै दैनिक फुटबल प्रशिक्षणमा नै रहने गर्दछन् ।

शिवले लामो समयपछि नेपाली फुटबलमा फर्कन पाउँदा खुसी लागेको बताए । ‘ नेपाली फुटबलमा फर्कन पाउँदा खुसी छु । राष्ट्रिय लिग खेलेपछि यहाँको लिग खेलेको थिइन । अहिले छुट्टीमा आएको बेलामा लिग खेल्ने अवसर पाएँ । यसको सक्दो सदुपयोग गर्ने प्रयास रहनेछ,’ उनले भने ।

शिवले विगतको तुलनामा आफ्नो खेल केहि बदलिएको महसुस गरेका छन् । ‘ पहिलाभन्दा केहि फरक खेल भएको जस्तो लाग्छ । शारीरिक रुपमा विकास भएसँगै खेल सुध्रिएको महसुस गरेको छु । नेपालको खेल्ने वातावरण भारतभन्दा फरक छ । मैदान र बल नै फरक छ । प्रशिक्षणमा निरन्तर मिहिनेत गरेपछि अवसर पाइएला,’ उनले थपे ।

पछिल्लो सिजनको तुलनामा थ्री स्टार कागजी रुपमा केहि कमजोर देखिएको छ । मैदानमा पनि सोहि अनुसार नतिजा ल्याउन नसकेको थ्री स्टारको टोलीमा आक्रमणमा निकै समस्या देखिएको थियो । आर्मीविरुद्ध हारमा पनि दुई उत्कृष्ट गोल नै फरक बनेको थियो । उक्त खेलमा कप्तान विक्रम लामा मैदानमा थिएनन् । डिफेन्समा भने थ्री स्टार अनन्त तामाङ र विक्रमसँगै विदेशी गोलरक्षक प्रिसोको कारण मजबुत छ ।

प्रशिक्षक मेघराज केसीले शिवको आगमनले आक्रमणमा केहि सहयोग हुने आशा लिएका छन् । ‘ शिवले हामीसँग २ दिन प्रशिक्षण गरेका छन् । उनलाई धेरै राम्रोसँग अध्ययन गर्न पाएको त छैन । शारीरिक रुपमा भने निकै राम्रा देखिएका छन् । सायद भोलिको खेलमा उनलाई राम्रोसँग नियाल्न पाइएला । सुरुवाती रोजाइमा नै खेल्ने सम्भावना पनि छ,’ केसीले भने ।

शिव उमेर समूहको टोलीमा सामान्यतया विंगरको भूमिकामा देखिने गर्दथे । बेलाबखत फरवार्डको समेत भूमिका निर्वाह गरेका उनले थ्री स्टारमा आफ्नो स्थान बनाउने राम्रो अवसर छ । युवा फरवार्ड विजय भुजेल, सुसन श्रेष्ठ र विदेशी खेलाडी हज्मतले अपेक्षित प्रदर्शन गर्न नसकेको अवस्थामा शिवको आगमनले टोलीलाई पक्कै सघाउ पुग्नेछ ।

थ्री स्टारले बुधबार लिगको खेलमा ब्रिगेड ब्वाइज क्लबको सामना गर्दैछ । थ्री स्टारले ४ खेलमा २ जित, १ बराबरी र १ हारसहित ७ अंक जोड्दा ब्रिगेड ब्वाइजले २ जित र २ हारको नतिजा निकाल्दै ६ अंक बनाएको छ ।