काठमाडौं (हाम्रो खेलकुद)– भारतीय खेलाडी मोहम्मद आसिफ च्यासल युथ क्लबमा आबद्ध भएका छन् । कतार एयरवेज सहिद स्मारक ए डिभिजन लिगका बाँकी खेललाई लक्षित गर्दै च्यासलले रक्षक आसिफलाई बुधबार अनुबन्धन गरेको हो ।

दक्षिण एसियाली खेलाडीको कोटाा असिफलाई च्यासलले भित्राएको हो । आसिफले गत सिजन नेपाल आयल निगम मनाङ मस्र्याङ्दी क्लबबाट खेलेका थिए । अखिल नेपाल फुटबल संघ (एन्फा) ले लिगका लागि तयार पारेको निमावलीमा लिगका सहभागी १४ टोलीले ४ विदेशी खेलाडीसम्म अनुबन्धन गर्न पाउनेछन् ।

४ खेलाडीले अनुबन्धन गर्नेले दक्षिण एसियाली एक खेलाडी अनिवार्य रुपमा लिनुपर्ने बाध्यात्मक व्यवस्था छ । विदेशी ३ खेलाडी सम्म अनुबन्धन गर्दा भने दक्षिण एसियाली खेलाडी राख्दै पर्ने बाध्यता छैन । च्यासलमा यसअघि नै ३ विदेशी खेलाडी आबद्ध भइसकेका छन् । त्यसमध्ये एक खेलाडी भने स्वदेश फर्किसकेको क्लबले जनाएको छ ।

लिगमा च्यासलका अब ६ खेल बाँकी छन् । सुखद सुरुवात गरेपछि लिग अघि बढ्दै जाँदा भने च्यासलको प्रदर्शन कमजोर हुँदै गएको छ । पछिल्लो खेलमा सोमबार टोली त्रिभुवन आर्मी क्लबसँग ३–० ले पराजित भएको थियो । ७ खेलमा एक मात्र जित निकालेको च्यासलले ३ खेलमा बराबरी र ३ खेलमै हार बहेोरको छ । टोली ६ अंकसहित १२ औं स्थानमा रहेको छ ।