काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिग अन्तर्गत आठौं राउन्डको तेस्रो दिन आज (शुक्रबार) दुई खेल हुदैछ । 

त्रिपुरेश्वस्थित दशरथ रंगशालामा हुने दिनको पहिलो खेलमा मनाङ–मर्स्याङ्दी क्लब र सरस्वती युथ क्लबबीच मध्यान्ह १२ बजे तथा दोस्रो खेलमा दिउँसो ३ बजे च्यासल युथ क्लब र ब्रिगेड ब्वाइज क्लब (बीबीसी) बीच प्रतिस्पर्धा हुदैछ ।

उपाधि यात्रालाई जीवितै राख्न मनाङलाई सरस्वतीविरुद्ध जितको विकल्प छैन । मनाङ रेलिगेशन जोनमा रहेको सरस्वतीलाई पराजित गर्दै उपाधि होडमै कायम रहन चाहन्छ । शुरुवाती तीन खेलमा जित हात पारेको मनाङ त्यसपछिको सबै चार खेलमा बरारीमा रोकिएको छ । मनाङ लिगमा अपराजित एक्लो टोली हो ।

प्रतिबन्धमा रहेका रन्जन विष्ट र सुरज विश्वकर्माको सरस्वतीविरुद्ध पूनरागमन गर्न सक्नेछन् । मछिन्द्रसँगको खेलमा हातपातमा उत्रिएपछि रन्जनले दुई खेलको कारवाही भोगेका थिए । सुरज दोहोरो पहेँलो कार्डका कारण प्रतिबन्धमा रहँदै एक खेल गुमाउन पुगेको थिए ।

बिमल राना, निशान लिम्बु, दीप कार्की, कमल श्रेष्ठ, फ्लोरेन्ट, दयानन्द सिंह, पुजन उपरकोटी, फेमी जोसवा, भिडाल लुइस, सुशिल लामा र आदित्य चौधरीको मनाङलाई साथ छ । मनाङ ७ खेलमा १३ अंक सहित तालिकाको चौथो स्थानमा छ । सरस्वतीलाई पराजित गर्दै मनाङ आर्मी र मछिन्द्रसँग अंक बराबरी गर्न चहान्छ ।

यता, रेलिगेसन जोनमा रहेको सरस्वती मनाङलाई स्तब्ध पार्दै ३ अंक लिने दाउमा हुनेछ । रेलिगेशन जोनमा रहेको सरस्वती बाँकी सबै ६ खेलमा नतिजा ल्याउदै रेलिगेशनबाट बच्न लक्ष्यमा हुनेछ । लिगमा जित निकाल्न नसकेको सरस्वती पहिलो जितको खोजीमा हुनेछ । तर, मनाङविरुद्ध जित निकाल्न सरस्वतीले निकै मिहेनत गर्नुपर्ने हुन्छ । बराबरी या पराजित भएको अवस्थामा सरस्वतीको रेलिगेसन सम्भावना बढेर जानेछ । सरस्ती १ अंक जोडेर पुछारमा छ ।

च्यासललाई बीबीसीको चुनौती

दिनको दोस्रो खेलमा च्यासल र बीबीसीबीच प्रतिस्पर्धा हुदैछ । दुवै टोली जितको लक्ष्यसहित मैदान उत्रदै अंक तालिकामा सुधार गर्ने योजनामा हुनेछ । च्यासल ६ अंकसहित १२औं स्थानमा तथा बीबीसी ८ अंकसहित नवौं स्थानमा रहेको छ ।

च्यासलले मनाङका पुर्व डिफेन्डर मोहम्मद आसिफलाई टोलीमा समेटेको छ । उनले बीबीसीविरुद्ध खेल्न सक्नेछ । लिगको सर्वाधिक गोलकर्ताको सुचीमा रहेका सन्तोष साहुखल नै बीबीसीविरुद्ध मुख्य हतियार हुनेछ ।

यता, राष्ट्रिय टोलीका पुर्व कप्तान अनिल गुरुङ र विजय गुरुङ र युवा खेलाडीले भरिएको बीबीसी च्यासललाई पराजित गर्दै अंक तालिका सुधार गर्ने लक्ष्यमा हुनेछ ।