प्रकाश तिमल्सिना, काठमाडौं

राष्ट्रिय फुटबल टोलीका मिडफिल्डर रोहित चन्द अर्को दुई सिजन इन्डोनेसियाको शीर्ष डिभजिनको पर्सिजा जकार्तामा रहने भएका छन् । रोहित र पर्सिजाबीच दुई वर्षका लागि  बुधबार सम्झौता नविकरण भएको छ ।

अघिल्लो सिजन सकिए लगत्तै स्वदेश फर्केका रोहित गत साता अष्ट्रेलिया हुँदै इन्डोनेसिया पुगेका थिए । सम्झौता गर्नुअघि बाटै रोहितले क्लबमा अभ्यास थालिसकेको थिए । सम्झौता रकम नखुलाइए पनि गत वर्ष भन्दा पारिश्रमिकमा बृद्धि भएको रोहितका दाजु रविन चन्दले बताएका छन् ।

सन् २०१३ मा रोहित पहिलो पटक पर्सिजामा आबद्ध भएका थिए । पछि २०१५ मा मलेसियाका सुपर लिग टोलीमा आबद्ध हुँदा उनको घुँडामा चोट लागेको थियो । त्यसपछि भने उनी झन्डै एक वर्ष भन्दा लामो समय मैदान बाहिर बस्नु परेको थियो ।

चोट मुक्त भएर २०१७ मा पुनः उनी पर्सिजामा आबद्ध भएका थिए । दुई वर्षअघि पर्सिजालाई लिग च्याम्पियन बनाउन महत्वपूर्ण भूमिका खेलेका रोहित लिगकै सर्वोत्कृष्ट खेलाडी घोषित भएका थिए ।

पछिल्लो सिजनमा भने टोली दसौं स्थानमा रह्यो । २०६६ सालमा मछिन्द्र क्लबबाछ घरेलु फुटबलमा डेब्यू गरेका रोहित अर्को वर्ष आइ लिग टोली एचएएलमा आबद्ध भएका थिए । सन् २०१२ मा उनी पहिलो पटक इन्डोनेसियन क्लबमा आबद्ध भएका थिए ।