प्रकाश तिमल्सिना, काठमाडौं

राष्ट्रिय टोलीबाट खेल्दा होस् वा कुनै क्लबबाट खेल्दा सावित्रा भण्डारी सम्बाको प्रभाव बेग्लै हुने गर्छ । कमै खेल होलान् जसमा सावित्राले गोल नगरेको होस् । कथम कदाचित गोल नगर्दा पनि खेलमा उनले प्रभाव छाडेकै हुन्छिन् । सावित्रा नै दक्षिण एसियाको उत्कृष्ट स्ट्राइकर हो भन्दा सायदै दुइमत होला । दक्षिण एसियाको महारथी भारतकै प्रशिक्षक मेमोल रकीले पनि बारम्बार यो कुरा स्वीकारेकी छिन् ।

उत्कृष्ट भएकै कारण उनी लगातार दोस्रो सिजन भारतको महिला लिग खेल्न त्यसतर्फ प्रस्थान गरेकी छिन् । पहिलो सिजनमै प्रभावशाली प्रदर्शन गरेकी सावित्राले यसपटक पनि प्रभाव छाड्ने संकेत गरिसकेकी छिन् । गत वर्ष सेथु एफसीलाई च्याम्पियन बनाउन १५ गोल गरेकी सावित्राले यसपटक गोकुलम केरेला एफसी रोजिन् । उनलाई अन्य टोलीले पनि अनुबन्धनका लागि प्रस्ताव राखेका थिए ।

चार दिन अघि छनोटको दोस्रो लेगमा ८–१ को जितमा २ गोल गरेकी सावित्राले आई लिगको पहिलो खेलमा टोलीको जितका लागि गोल गरिन् । उनकै एक मात्र गोलमा टोलीले विजयी सुरुवात गरेको छ । राष्ट्रिय टोली होस् या क्लब फुटबल सधैं ९ नम्बर रोज्ने सावित्राको यसपटक जर्सी नम्बर भने फेरिएको छ । उनको पहिलो रोजाईमा रहेको ९ नम्बर जर्सी क्लबकै सिनियर खेलाडीको रोजाईमा परेपछि उनले ७ नम्बर जर्सी रोजिन् ।

सावित्राले भनिन् ‘मलाई लाउन त ९ नम्बर नै लाउन मन थियो । तर, सिनियर खेलाडीले लगाएपछि मैले अर्को लगाउनु पर्ने भयो । अनि ७ रोजे ।’ जर्सी नम्बर ९ भारतको राष्ट्रिय टोलीबाट लामो समय खेलेकी फरवार्ड कमला देवीले लगाएकी छिन् । पछिल्लो समय राष्ट्रिय टोलीमा नरहेपनि उनले घरेलु फुटबल भने खेलिरहेकी छिन् ।

विश्व फुटबलका सफल र चर्चित क्रिस्टियानो रोनाल्डोका करोडौं फ्यान मध्य सावित्रा पनि एक हुन् । सावित्राले ७ नम्बर जर्सी रोज्नुको पछाडी कारण पनि आफ्नो मनपर्ने खेलाडी रोनाल्डो नै थिए । सावित्राले ७ नम्बर जर्सीमा गोल गरेलगत्तै उनैले जस्तो सेलिब्रेसन पनि गरिन् । ‘९ नम्बर नपाएपछि विकल्पमा मैले रोनाल्डोले लगाउने ७ नम्बर रोजें,’ उनले भनिन् ।

आइतबारको गोलमा सेलिब्रेसन रोनाल्डो शैलीमा नै गरिन् । त्यसो त उनले यसअघि पनि पटक पटक सोहि किसिमको सेलेब्रेसन गरेकी थिइन् तर आइतबार भने उनले योजना नै बनाएकी थिईन् । हाम्रो खेलकुदसँग कुराकानीका क्रममा सावित्राले उत्साहित हुँदै भनिन्, ‘ आज गोल गरें भने रोनाल्डोको शैलीमा सेलिब्रेसन गर्छु भन्नेमा थिए । ७ नम्बर जर्सीमा त्यो सेलिब्रेसन गर्छु भन्ने सोचेर गरेको हुँ ।’

मैदानबाहिर पनि चर्चामा रहने सावित्रा मैदानभित्र पनि पछिल्लो समय उत्कृष्ट लयमा छिन् । नेपालका लागि उनले गरेको गोलबाट पनि थाहा हुन्छ उनी कति क्षमतावान खेलाडी हुन् । राष्ट्रिय टोलीमा झन्डै ६ वर्षको यात्रामा उनले देशका लागि ३८ गोल गरिसकेकी छन् । यो आँकडा छुनु चल्तीका अन्य फरवार्डका लागि सहज पक्कै छैन । टोलीकी महत्त्वपूर्ण सदस्य रहेकै अवस्थामा उनले ३८ गोल गरिसकेकी छिन् । केहि वर्षमा उनको गोलको आँकडा ५० नाघ्ने अनुमान गर्न सकिन्छ ।

राष्ट्रिय टोलीमा पुरुषतर्फ हेर्ने हो भने उच्च गोल संख्या १३ छ । हरि खड्का र निराजन रायमाझीको नाममा समान १३ गोलको कीर्तिमान छन् । दुवै राष्ट्रिय टोलीका पूर्व खेलाडी भइसकेका छन् । पछिल्लो पटक निराजनले सन् २००८ मा हरिको कीर्तिमान बराबरी गरेपछि अहिले सम्म उनीहरुको कीर्तिमान तोडिएको छैन । यो त राष्ट्रिय टोलीको तुलाना भयो ।

सावित्राले घरेलु फुटबलमा गरेको गोलको अहिले सम्म कुनै तथ्याङ्क पाउन मुस्किल छ । अधिकांश प्रतियोगितामा उनी नै उच्च गोलकर्ता बन्छिन् । एउटै खेलमा ९ गोलसम्म पनि उनले गरेकी छिन् । घरलु फुटबलमा अहिले उनलाई चुनौति दिने खेलाडी तयार भइसकेको छैन । अब उनले दक्षिण एसियाका अन्य क्लबमा पनि आफ्नो क्षमता प्रदर्शनको मौका पाइरहेकी छिन् ।

आउने दिनमा उनलाई विश्व फुटबल जगतमा अर्को फड्को मार्ने खुड्किलोको रुपमा भारतीय लिग बलियो आधार बन्ने धेरैले अपेक्षा राखेका छन् । अहिले भने उनले लगातार दोस्रो सिजन भारतीय लिग जिताउन गोकुलमको जर्सीमा हुनेछिन् । आफ्नो प्रिय खेलाडी रोनाल्डोको जर्सीमा उनी पुरानै सफलता हासिल गर्न तत्पर छिन् ।