काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिग फुटबलमा सोमबारदेखि नवौं राउन्डको खेल सुरु हुँदैछ ।

नवौं राउन्डको पहिलो दिन दुई खेल हुनेछ । दिनको पहिलो खेलमा दुई विभागीय टोली नेपाल पुलिस क्लब र नेपाल एपिएफ क्लबबीच मध्यान्ह १२ बजे तथा सानमिगेल मछिन्द्र क्लब र रुस्लान थ्री स्टारबीच दिउँसो ३ बजे प्रतिस्पर्धा हुँदैछ । दुवै खेल त्रिपुरेश्वस्थित दशरथ रंगशालामा हुनेछ ।

स्टार खेलाडीले भरिएको मच्छिन्द्र र थ्री स्टारबीको खेल निकै रोचक र प्रतिस्पर्धात्मक हुने अपेक्षा गरिएको छ । दुई बलिया टोलीबीचको नतिजाले लिगको उपाधि समीकरणसमेत प्रभावित बन्नेछ । मच्छिन्द्रले यो खेलमा जित हात पारे शीर्षस्थानमा पुनरागमन गर्नेछ । पराजित भएको अवस्थामा भने उपाधि यात्रामा धक्का लाग्नेछ । बराबरीले पनि उपाधि सम्भावना झिनो बन्ने छ ।
सातौं चरणमा शेर्पासँगको २–० को अप्रत्यासित हारले उपाधि यात्रा कमजोर बनेको मच्छिन्द्र थ्री स्टारलाई पराजित गर्दै उपाधि यात्रामा फर्कने दाउमा हुनेछ ।

अघिल्लो सिजन मनाङमा रहेका प्रायः सबै र थ्री स्टारका केही खेलाडीलाई समेटेर बलियो टोली बनाएको मच्छिन्द्रसँग विराज महर्जन, बिशाल राई, बिशाल श्रेष्ठ, सुजल श्रेष्ठ, रेजिन सुब्बा, देवेन्द्र तामाङ, रन्जित धिमाल र एडिलाजा सोमिडेजस्ता खेलाडी रहेका छन् । उनीहरूले जुनसुकै बेला पनि नतिजा उल्ट्याउन सक्नेछन् ।
यता, औसतको टोली बनाएर लिग खेल्दै औसतकै प्रदर्शन गरिरहेको थ्री स्टार मच्छिन्द्रलाई स्तब्ध पार्दै उपाधि यात्रामा अघि बढ्न चाहन्छ ।

मच्छिन्द्रलाई पराजित गरे थ्री स्टार दोस्रो स्थानमा उक्लनेछ । मच्छिन्द्रले उपाधि दौडलाई थप मजबुद बनाउने वा थ्री स्टारले शीर्ष टोलीलाई दबाब दिने अर्थमा रोमाञ्चक हुनेछ । भारतीय लालरमाभिया, सञ्जोक राई र निशान खड्काको आगमनसँगै थ्री स्टार केही बलियो देखिएको छ । बिक्रम लामा, अनन्त तामाङ, मिक्छेन तामाङ, रुपेश केसी र प्रिसोको साथ पनि थ्री स्टारलाई हुनेछ ।

लिगको आठौं चरणको खेल सकिँदा मच्छिन्द्र ८ खेलबाट ५ जित, १ हार र २ बराबरीसँगै १६ अंक जोडेर दोस्रो स्थानमा रहेको छ । थ्री स्टार ४ जित, दुई हार र दुई बराबरीसँगै १४ अंक जोडेर चौथो स्थानमा रहेको छ ।

त्यसअघि उपाधि दौडमा केही कमजोर देखिएको पुलिस र एपीएफबीच प्रतिस्पर्धा हुनेछ । लिगको प्रतिस्पर्धासँगै विभागीय डर्बीमा प्रतिष्ठाको लडाइँ पनि जोडिएको हुन्छ । त्यसर्थ त्यो खेल हेर्न लायक हुनेछ । एपीएफलाई भने रेलिगेसन क्षेत्रबाट माथि उठ्ने लागि मौका हुनेछ । पुलिस एपीएफलाई पराजित गर्दै शीर्ष टोलीलाई दबाब दिने लक्ष्यमा हुनेछ ।

पुलिसलाई लिगमा चार गोल गरिसकेका सुमन लामा, अजित भण्डारी, रवि पासवान, प्रवेश कुँवर, भोलानाथ सिलवाल र सौजन राईजस्ता खेलाडीको साथ छ । यता, एपीएफ पुलिसलाई पराजित गर्दै रेलिगेसन जोनभन्दा माथि उठ्ने लक्ष्यमा हुनेछ । एपीएफसँग लिगमा पाँच गोल गरिसकेका आशीष लामा, नवीन लामा र रमेश दंगालको साथ छ ।