काठमाडौं (हाम्रो खेलकुद) – कतार एयरवेज सहिद स्मारक ए डिभिजन लिग अन्तर्गत सोमबारको पहिलो खेलमा नेपाल पुलिस क्लबले नेपाल एपीएफ क्लबलाई १-० ले पराजित गरेको छ ।

पाँचौ मिनेटमा पुलिसका भरत शाहको प्रहारलाई गोलरक्षक अमृत चौधरीले विफल पारे । आठौं मिनेटमा भरत शाहकाे पासलाई सौजन राईले भेट्न सकेन । ११ अौं मिनेटमा सौजन राईकाे फ्रिकिक बाहिरियाे ।

१३ अौं मिनेटमा पुलिसले भोला सिलवालको पेनाल्टी गोलमा अग्रता लियो । कर्नर प्रहारमा हेडर गर्ने क्रममा राजन गुरुङले भरत शाहलाई धकेलेपछि रेफ्री प्रकाशनाथ श्रेष्ठले पेनाल्टी दिएका थिए । उक्त अवसरलाई कप्तान भोलाले गोलमा परिणत गरे ।

३८ अौं मिनेटमा आशिष लामाको फ्रिकिक बाहिरिदा एपीएफ बराबरीबाट चुक्याे । ४२अौं मिनेटमा प्रदिप लामाकाे कर्नरमा रमेश दंगालकाे हेडर पाेस्टबाट थोरै बाहिरिदा एपिएफ पुनः बराबरी गर्नबाट चुक्याे ‌।

पहिलो हाफमा पछाडि परेको एपिएफले दोस्रो हाफमा सुधारिएको प्रदर्शन गर्यो । ५०अौं मिनेटमा रवि पासवानकाे पासमा नीर कुमार राईकाे प्रहारलाई एपिएफका सुदिप शिख्रकारले गाेल लाइनबाट बचाउदा पुलिस अग्रता दाेब्बर बनाउनबाट चुक्याे । ५४अौं मिनेटमा रमेश दंगालकाे गल्तीमा सौजनले बल खाेस्दै भरत शाहलाई दिएकाे पासलाई रवि पासवानकाे प्रहार गाेलक्षक अमृत चौधरीले बचाए ।

६२अौं मिनेटमा नवीन लामाकाे फ्रिकिकलाई गाेलरक्षक राेशन खड्काले पञ्च गरेर बचाएपनि रिवाउन्डमा बुद्विमान राईकाे प्रहारलाई सन्ताेष हेमरुनले डाईभिङ हेडिङ गर्दै बचाए ।

इन्ज्युरी समयको तेस्रो मिनेटमा राजिव लोप्चनको प्रहारलाई रोशन खड्काले उत्कृष्ट बचाउ गरे । त्यसबाट आएको कर्नरमा एपिएफको तीन प्रहार गोल हुन सकेन । खेल सकिएपछि रेफ्रिमाथि अभद्र व्यवहार गरेपछि एपिएफका सुदीप सिख्राकारलाई रातो कार्ड देखाए ।

यस जितसँगै पुलिसले ९ खेलका १४ अंक बनाएको छ । पुलिस ४ जित र २ बराबरीको नतिजाले पाँचौ स्थानमा उक्लियो । एपिएफ भने ५ अंकसहित पुछारबाट दोस्रो स्थानमा छ ।