काठमाडौं (हाम्रो खेलकुद)– कतार एयरवेज सहिद स्मारक ए डिभिजन लिगको उपाधि दौड मात्र होइन रेलिगेसन टार्ने अभियान पनि रोचक बनेको छ । अंक तालिकाको पुछारमा रहेको सरस्वती क्लबले जारी लिगमा पहिलो जित दर्ता गरेपछि तल्लो क्रममा रहेका अन्य टोली माथि दबाब बढेको छ ।
हाइस्कोरिङ म्याचमा सरस्वतीले १२ औं स्थानमा रहेको यति हिमालयन शेर्पालाई मंगलबार ४–३ ले हराउँदै लिगमा पहिलो जित निकालेको हो । यद्दपी टोली पुछारबाट उक्लन भने सकेन । ५ अंक सहित नेपाल एपिएफ १३ औं स्थानमा छ भने सरस्वतीको ४ अंक पुगेको छ । सरस्वतीले यसअघि एउटा खेलमा बराबरी गरेको थियो ।
सातदोबाटोस्थित एन्फा कम्प्लेक्सको मैदानमा सरस्वतीलाई जित दिलाउन काजिम बुसारीले २, विनोद केसी र मनिष थापाले गोल गरेका थिए । शेर्पाका लागि आशिष गुरुङ, विजय श्रेष्ठ, रवि थापाले गोल गरे ।
पाँचौै मिनेटमा बुसारीले गोल गर्दै सरस्वतीलाई अग्रता दिलाए । निशान माझीको क्रसमा विनोद केसीले प्रहार गरेपनि शेर्पाका कप्तान मान बहादुर तामाङले ब्लक गरेपनि पूर्ण बहादुर श्रेष्ठको क्रसमा बुसारीले गोल गरेका हुन् ।
१० औं मिनेटमा आशिष गुरुङले गोल गर्दै शेर्पालाई बराबरीमा ल्याए । रवि थापाको फ्रिकिकमा आशिषले हेडिङ गोल गर्न सफल भएका थिए । २० औं मिनेटमा शेर्पाका गोलरक्षक किशोर गिरीले सरस्वतीको प्रहारलाई मुस्किलले पञ्च गर्दै बचाए ।
३५औं मिनेटमा विनोद केसीले गोल गर्दै सरस्वतीलाई २–१ को अग्रता दिलाए । बुसारीले अलरिच सिवेलाई बिट गर्दै दिएको उत्कृष्ट क्रस पासमा गोलरक्षक समेत विट भएको अवस्थामा विनोदले खाली पोस्टमा गोल गर्न सफल भएका थिए । ४५ औं मिनेटमा विजय श्रेष्ठले गोल गर्दै खेललाई २(२ गोलको बराबरीमा ल्याए ।
६०औं मिनेटमा काजिम बुसारीको प्रहार पोस्टबाट थोरै बाहिरियो । ८४औं मिनेटमा काजिम बुसारीले गोल गर्दै सरस्वतीलाई ३–२ को अग्रता दिलाए । निशान माझीको कर्नरमा बुसारीले हेडमार्फत गोल गर्न सफल भए । ८८औं मिनेटमा मनिष थापाले गोल गर्दै सरस्वतीलाई ४–२ ले अघि बढाए ।
इन्ज्युरी समयको थप गरिएको दोस्रो मिनेटमा रवि थापाले गर्दै खेललाई ४–३ को अवस्थामा ल्याए । सरस्वतीका बुसारी केल्मी म्यान अफ दी म्याच चुनिए । ९ खेलमा १ जित र ४ खेलमा बराबरी गरेको शेर्पाको ७ अंक छ । आजै अर्को खेलमा त्रिभुवन आर्मी क्लबले प्रभु बैंक जावलाखेल युथ क्लबको सामना गर्नेछ ।
