काठमाडौं (हाम्रो खेलकुद) – कतार एयरवेज सहिद स्मारक ए डिभिजन लिग अन्तर्गत त्रिभुवन आर्मी क्लबले जावलाखेल युथ क्लबलाई १-० ले पराजित गरेको छ । कप्तान भरत खवासको निर्णायक गोलसँगै आर्मी लिग तालिकाको शीर्ष स्थानमा उक्लिएको छ ।

खेलकाे ११ अौं मिनेटमा टंक बहादुर बस्नेतकाे पासमा नवयुग श्रेष्ठले बक्सभित्र बल भेटाएपनि नियन्त्रणमा लिन नसक्दा आर्मी अग्रता लिनबाट चुक्याे । १९  अौंमिनेटमा टंक बहादुर बस्नेतकाे क्रसलाई प्रभु जावलाखेलका गोलरक्षक अरुण ब्लाेनले पञ्च गर्दै बचाए ।

३१  अौं मिनेटमा सुजित बुढाथोकीकाे क्रस पासमा गोलरक्षक बिकेश कुथु बिट भइसकेकाे अवस्थामा फाेडे फाेफानाकाे हेडरलाई आफ्नै टाेलीका ड्याडी जुनियर वाम्वाले गाेललाइनबाट बचाउँदा जावलाखेल अग्रता लिनबाट चुक्याे । ४० अौं मिनेटमा रुप बहादुर लामाकाे फ्रिकिक सदुपयाेग हुन सकेन ।

४७अौं मिनेटमा नवयुग श्रेष्ठकाे प्रहार दोस्रो बारबाट थोरै बाहिरिदा आर्मी पुनः अग्रता लिनबाट चुक्यो । ६२अौं मिनेटमा बिकास खवासकाे क्रस पासमा कप्तान भरत खवासकाे हेडर फितलाे बन्यो । त्यसमै नवयुग श्रेष्ठले ह्यान्ड गर्न पुगे ।

६६अौं मिनेटमा रुप बहादुर लामाकाे उत्कृष्ट प्रहारलाई आर्मीका गाेलरक्षक बिकेश कुथुले उत्कृष्ट डाइभ दिदै बचाए । ७१अौैं मिनेटमा सिमन्त थापाकाे प्रहार पोस्टबाट थोरै बाहिरियाे ।

७४अौं मिनेटमा कप्तान भरत खवासकाे गोलमा आर्मीले खेलमा अग्रता बनायो । टेक बहादुर बुढाथोकीको पासमा भरतको हाफ भली प्रहार टप कर्नरमा उत्कृष्ट गोलमा परिणत भएको थियो । ८४अौं मिनेटमा कर्नरमा एडमा डोम्वियाकाे हेडरलाई सेसेहाङ आङ्देम्वेले गोललाईनबाट क्लियर गरिदिदै सम्भावित बराबरी टारे ।

यस जितसँगै आर्मीले ९ खेलमा २० अंक जोडेको छ । दोस्रो स्थानमा रहेको मछिन्द्रभन्दा आर्मी १ अंकले अगाडि छ । जावलाखेल १२ अंकसहित सातौं स्थानमा रहेको छ ।