अर्जुन कार्की, बागलुङ

आयोजक बागलुङ नगरपालिका र चौदण्डीगढी नगरपालिका दोस्रो मेयर कप राष्ट्रिय फुटबल प्रतियोगिताको उपाधिको लागि भिड्ने भएका छन् । बागलुङ बजारमा जारी प्रतियोगितामा सोमबार बागलुङले तनहुँको भीमाद नगरपालिकालाई १–० ले हरायो ।

उदयपुरको चौदण्डीगढीाले म्याग्दीको बेनी नगरपालिकालाई सडन डेथमा ६–५ ले हराउँदै अन्तिम दुईमा पुगेको हो । सडन डेथमा पवन कार्कीको गोल निर्णायक बनेको थियो । आशिष केसीले ८७ औं मिनेटमा पेनाल्टीमा गरेको गोलमा बागलुङ विजयी भएको थियो ।

भीमादका प्रदिप थापाले ध्रुब घिमिरेलाई पेनाल्टी बक्समा फाउल हानेपछि बागलुङले पेनाल्टी पाएको थियो । खेलको अन्त्यमा बागलुङ १० खेलाडीमा सिमित भएको थियो । गोल सेलिब्रेसनमा जर्सी खोलेपछि दोहोरो पहेलो कार्डको दर्शक गर्दै आशिषले मैदान छाड्नु परेको थियो ।
चौदण्डीगढीले म्याग्दीलाई सडनडेथमा ६–५ गोलअन्तरले पराजित गर्दै उपाधि नजिक पुगेको हो ।

निर्धारित ७० मिनेटको खेलमा दुवै टिम १–१ गोलबारबरीमा सकिएपछि खेल सिधै टाइब्रेकरमा पुगेको थियो । खेलको ४९ औं मिनेटमा म्याग्दीका सन्तोष पुनले फ्रिकिक गोल गर्दै टिमलाई अग्रता दिल्याएका थिए । निरन्तर आक्रमक खेलेको चौदण्डीगढीको लागि ६० औं मिनेटमा सुदिप श्रेष्ठले गोल गर्दै खेललाई बराबरीमा ल्याए ।

ट्राइब्रेकरमा खेल ५–५ को बराबरी भएपछि सडनडेथमा म्याग्दीका दिवस छन्त्यालको प्रहार बाहिरियो । चौदण्डीगढीका पवन कार्कीले गोल गर्दै आफ्नो टिमलाई फाइनलमा पु¥याए ।टाइब्रेकरमा म्याग्दीका सन्तोष पुन, रिमान मगर, निशान गुरुङ, अजय रामजाली र धानेन्द्र क्षेत्रीले गोल गरेका थिए । यस्तै चौदण्डीगढीका सागर राई, प्रदिप गुरुङ, अनिश राई, सुदिप श्रेष्ठ र सौजन राईले गोल गरेका थिए । फाइनल खेल मंगलबार हुनेछ ।

बागलुङ नगरपालिकाको आयोजना र जिल्ला फुटबल संघ बागलुङको समन्वयमा संचालित प्रतियोगिताको विजेताले उपाधिसहित ३ लाख, दोस्रोले २ लाख र सेमिफाइनल पुग्ने समान ६० हजार रुपैयाँ प्राप्त गर्नेछन् । प्रतियोगिताको सर्वोत्कृष्ट खेलाडीले दश हजार तथा उत्कृष्ट फरवार्ड, मिडफिल्डर, डिफेन्डर, गोलकिपर र उच्च गोलकर्ताले समान ५ हजार रुपैयाँ प्राप्त गर्नेछन् ।