काठमाडौं (हाम्रो खेलकुद)– नेपाल पुलिस क्लब शुक्रबार जित हासिल गर्दै कतार एयरवेज सहिद स्मारक ए डिभिजन लिगको पाँचौं स्थानमा पुगेको छ ।
पुलिसले ब्रिगेड ब्वाइज क्लबलाई १–० ले हराउँदै पाँचौं स्थानमा उक्लेको हो । ११ खेलमा पाँचौं जित निकालेको पुलिसले २ खेलमा बराबरी र ५ खेलमा हार बेहोरेको छ । पुलिसको १७ अंक पुगेको छ ।
सातदोबाटोस्थित एन्फा कम्प्लेक्सको मैदानमा भएको खेलको पहिलो हाफमा भरत शाह गरेको गोल नै पुलिसलाई जित हासिल पर्याप्त रह्यो । निरकुमार राईको कर्नरमा भरतले हेडमार्फत गोल गरेका थिए ।
आजै रुस्लान थ्री स्टार क्लब संकटा क्लबलाई शुक्रबार १–० ले हराउँदै अंक तालिकाको तेस्रो स्थानमा उक्लेको छ । दोस्रो हाफमा रक्षक अनन्त तामाङले गरेको गोलमा थ्री स्टार विजयी भएको हो ।
११ खेलमा छैटौं जितपछि थ्री स्टारको २० अंक पुगेको छ । शीर्षस्थानको त्रिभुवन आर्मी क्लबको २६ र दोस्रो स्थानको सानमिगेल मछिन्द्र क्लबको २५ अंक छ । १९ अंकको नेपाल आयल निमग मनाङ मस्र्याङ्दी क्लब चौथो स्थानमा झरेको छ । मनाङले १ खेल कम खेलेको छ ।
सातदोबाटोस्थित एन्फा कम्प्लेक्सको मैदानमा अनन्तले ६१ औं मिनेटमा गरेको गोल नै खेलको निर्णायक बन्यो । संकटाका रक्षकबाट डिफेक्ट भएर आएको बलमा अनन्तले नजिकबाट गोल गरेका थिए । संकटा १५ अंकसहित पाँचौं स्थानमा छ ।
