काठमाडौं (हाम्रो खेलकुद) – सरस्वती युवा क्लब कतार एअरवेज सहिद स्मारक ए डिभिजन लिगमा एक खेल बाँकी रहँदै रेलिगेसनमा परेको छ । सोमबार एन्फा कम्प्लेक्सको मैदानमा च्यासल युवा क्लबसँग २-१ ले पराजित भएपछि सरस्वती बी डिभिजनमा घटुवा भएको हो ।

सरस्वतीले लिगको १२ खेलमा ४ अंक जोड्दै पुछारमा रहँदा १३ औं स्थानमा रहेको ब्रिगेड ब्वाइज र १२ औं स्थानमा रहेको एपीएफको समान ८-८ अंक छ । अन्तिम खेलमा जित हात पारेपनि पुछारबाट उक्लन नसक्ने पक्का भएपछि सरस्वती रेलिगेसनमा परेको हो ।

खेलको १४ औं मिनेटमा मनिष थापाको प्रहार च्यासलका गोलरक्षक एलेन न्यौपानेले बचाए । १६ औं मिनेटमा हमयतो वाकिनोको प्रहार सर्वतीका गोलरक्षक बिष्णु कुमार केसीले मुस्किले बचाए । १८ औं  मिनेटमा टाइगा नाकामुराले फ्रिकिकमा सुन्दर गोल गर्दै च्यासललाई अग्रता दिलाए । दिपक भुसालले टाईगालाई लडाएपछि झन्डै ३५ यार्डमा प्राप्त फ्रिकिकलाई उनैले सदुपयोग गरेका थिए ।

५९ औं मिनेटमा आन्द्रे एक्वेमले झन्डै ३० यार्ड टाढाबाट गरेको फ्रिकिक प्रहारलाई गोलरक्षक एलन न्यौपानेले दोस्रो प्रयासमा बचाए । त्यसको ५ मिनेट नबित्दै एक्वेमले आफ्नो पेनाल्टी क्षेत्रभित्र हायातो वाकिनोलाई लडाएपछि च्यासलले पेनाल्टी प्राप्त गर्यो । हायातोले नै पेनाल्टीलाई गोलमा परिणत गर्दै च्यासलको अग्रता दोब्बर पारे ।

सरस्वतीले ७० औं मिनेटमा खेलमा फर्कने सुवर्ण अवसर पायो । फरवार्ड काजिम बुसारीले पेनाल्टी क्षेत्रको ठिक बाहिरबाट प्रहार गरेको हाफ भली क्रसबारमा लागेर बाहिरियो । ८२ औं मिनेटमा मनिष थापाले पेनाल्टी क्षेत्रको ठिक बाहिरबाट गरेको भली प्रहारले पोस्टको दिशा किन सकेन । ८७ औं मिनेटमा हिसुब थपलियाको पासमा बुसारीको प्रहारले पोस्टको दिशा लिन सकेन । इन्ज्युरी समयमा काजिम बुसारीले गोल फर्काएपनि रेलिगेसन टार्न भने सकेन ।

त्यसअघि दिनको पहिलो खेलमा एपिएफले फ्रेन्ड्सलाई ५-२ ले पराजित गरेको थियो । एपिएफको जितमा आशिष लामा र प्रविणकुमार स्याङ्तानले समान २-२ तथा कप्तान तोपबहादुर विष्टले १ गोल गरे । फ्रेन्ड्सका लागि दोस्रो हाफमा फिलिपे डि सौजा र  विश्व अधिकारीले १-१ गोल फर्काए ।

आशिषले १२ औं मिनेटमा गोलको खाता खोले भने उनले नै ४० औं मिनेटमा अर्को गोल गरेका थिए । फ्रेन्ड्सका लागि फिलिपेले ६९ औं मिनेटमा गोल फर्काउँदै अन्तर घटाए । ७१ औं मिनेटमा एपिएफका लागि प्रविणले गोल गर्दै पुनः गोल अन्तर बढाए ।

त्यसको ५ मिनेटपछि विश्वले फ्रेन्ड्सका लागि गोल गर्दै टोलीलाई खेलमा फर्काउने प्रयास गरे । तर इन्ज्युरी समयको चौथो र पाँचौ मिनेटमा एपिएफले गोल गर्दै जित निश्चित गर्यो । इन्ज्युरी समयको चौथो मिनेटमा तोपबहादुर र पाँचौं मिनेटमा प्रविणले गोल गरेका थिए ।