काठमाडौं (हाम्रो खेलकुद) – मछिन्द्र क्लब कतार एयरवेज सहिद स्मारक ए डिभिजन लिगको शीर्षस्थानमा उक्लिएको छ । सोमबार एन्फा कम्प्लेक्स मैदानमा संकटालाई ३-१ ले हराउँदै मछिन्द्र अग्रस्थानमा पुगेको हो ।

मछिन्द्रको जितमा देवेन्द्र तामाङ, विशाल राई बी र दीपक राईले १-१ गोल गरे । पहिलो हाफका लागि १ मिनेट बाँकी रहँदा देवेन्द्र तामाङले गोल गर्दै मछिन्द्रलाई अग्रता दिलाएका थिए। रञ्जित धिमालको कर्नरमा देवेन्द्रले हेडमार्फत गोल गरेका थिए ।

त्यसअघि २६ औं मिनेटमा अर्नेस्ट टम्पीले विपक्षीको प्रहारलाई क्लियर गर्न खोज्दा आफ्नै पोस्टमा पुग्दा संकटाका गोलरक्षक विनय श्रेष्ठले उत्कृष्ट डाइभ दिदै बचाए । लगत्तै प्राप्त कर्नरमा एडिलाजा सोमिडेको हेडर पोस्टबाट थोरै बाहिरदा मछिन्द्र अग्रता लिनबाट चुक्यो । ४० औं मिनेटमा दीपक राईको बक्स बाहिरको प्रहार गोलरक्षक विनय श्रेष्ठले सहजै बचाए ।

५४अौं मिनेटमा लक्ष्मण रुचालको फ्रिकिकलाई मछिन्द्रका गोलरक्षक विशाल श्रेष्ठले सहजै बचाए । ६४अौं मिनेटमा विशाल राई ‘बी’ ले फ्रिकिकमा सिधै गोल गर्दै मछिन्द्रको अग्रता दोब्बर पारे । गोलरक्षक पोजिसनमा नरहेको अवस्थामा बिशालको फ्रिकिकले पोस्टको दिशा लिएको थियो । ६७अौं मिनेटमा बुद्वराज लिम्बुको फ्लिक प्रहार बाहिरियो ।

८२अौं मिनेटमा रन्जित धिमालको पासमा दीपक राईले गोल गर्दै मछिन्द्रलाई ३-० को अग्रता दिलाए । ९०अौं मिनेटमा संकटाका मसोउकीले गोल गरेपनि मछिन्द्र ३-१ ले बिजयी हुन सफल भयो ।

यस जितसँगै मछिन्द्रको १२ खेलमा २८ अंक बनाएको छ । दोस्रो स्थानमा रहेको आर्मीले १ खेल कम खेल्दै २६ अंक जोडेको छ ।