प्रकाश तिमल्सिना, काठमाडौं

राष्ट्रिय फुटबल खेलाडी विमल घर्ति मगर मैदान फर्कन आतुर छन् । ९० दिनको निलम्बन फुकुवा भएको दुई दिनपछि उनी सानमिगेल मछिन्द्र क्लबको जर्सीमा मैदान उत्रने तयारी छन् । कतार एयरवेज सहिद स्मारक ए डिभिजन लिगको अन्तिम खेलका रुपमा रहेको शनिबार शीर्षस्थानको त्रिभुवन आर्मी क्लबविरुद्ध विमल मछिन्द्रको जर्सीमा देखिने भएका हुन् ।

पछिल्लो समय माल्दिभ्सको टिसी स्पोर्टसमा आबद्ध रहेका उनले इन्टरनेसनल ट्रान्सफर सर्टिफिकेट (आइटिसी) लिएपछि मछिन्द्रबाट एन्फामा दर्ता हुनेछन् । पुनरागमनलाई लिएर उत्साहित विमलले भने,‘ फेरि फुटबलमा फर्कन लाग्दा एकदमै खुसी छु ।’ अनुशासन उल्लघंन गरेपछि उनीसहित अन्जन विष्ट, सन्तोष तामाङ र दीनेश राजवंशी कारवाहीमा परेका थिए ।

४५ दिनको निलम्बनबाट फुकुवा भएर अन्जन र सन्तोषले लिगमा उच्च प्रदर्शन गरिरहँदा विमल र दीनेश भने दर्शकमै सिमित थिए । उनलाई र दीनेशलाई भने अखिल नेपाल फुटबल संघ (एन्फा) ले ९० दिन निलम्बनमा राखेको थियो । जरिवाना भने चारै जनालाई ५० हजार तोकेको थियो ।

‘निलम्बनको तीन महिना तीन वर्ष भन्दा लामो लाग्यो । हरेक दिन केहि न केहि कुरा मनमा खेल्ने । दिन कसरी बित्ला भन्ने लाग्ने । गल्ति भइसकेकोले त्यसमा रिग्रेट गर्ने बाहेक हामीसँग अर्को विकल्प थिएन,’ विमलले स्मरण गरे,‘ फुटबल एकदमै मिस भयो । घरेलु मैदानमा भएको १३ औं दक्षिण एसियाली खेलकुद (साग) खेल्न पाइएन । एउटा खेलाडीका लागि त्यो भन्दा दुःख के होला र ?’

मंसिर २४ गते सागको फाइनल उनले दशरथ रंगशालामा पुगेर हेरेका थिए । तर, मास्क लगाएर । उनी निर्धक अरुले चिनिने गरि फुटबल हेर्ने अवस्थामा थिएनन् । उनी त्यसमा दुई वटा कारण रहेको बताउँछन् ।

‘एउटा त कसरी दर्शकलाई फेस गर्ने भन्ने थियो । अर्को पहिलो खेलको घटनाले झन बढी दुःख लाग्यो,’ उनले सम्झिए,‘ हाम्रो र भुटानकै खेलको म हाफ टाइममै हिँडे । वरिपरि बसेकाले आफ्नै बारेमा ठिक पर्यो भनेपछि बस्नै मन लागेन । आफ्नो नामनै लिएर त्यस्ता जड्याहाहरुलाई ठिक्क भयो भन्ने सुनेपछि कसरी बस्नु । अनि पछि फाइनलमा मात्र गए । त्यो पनि नचिनिने गरि ।’

विमलले चोट लाग्दा बाहेक मैदान बाहिर कहिल्यै बस्नु परेको थिएन । तर, आफ्नै गल्तिले निलम्बनमा परेपछि निकै पछुतो लागेको सुनाए । ‘गल्ति भएको हो । हामी सबैले मान्यौं । राष्ट्रिय टोलीबाट टुर जानु अघिल्लो दिन त्यसरी डिस्को जानु हाम्रो ठूलो भूल हो,’ उनले भने,‘ त्यो गल्तिको हामीले सजाएपनि पायौं र जीवनमा ठूलो पाठ पनि सिकियो ।’

उनले आउने दिनमा त्यस्तो घटना नदोहोरिने वचन दिएका छन् । ‘ जुन गल्ति भयो । जीवनमा त्यो नै अन्तिम होस् भन्ने छ,’ उनको प्रतिवद्धता छ,‘अब त्यो गल्ति कहिल्यै दोहोरिने छैन । फेरि एकपटक फुटबल र आफ्ना समर्थकसँग म हात जोडेर माफी माग्न चाहन्छु । जे भयो , त्यसमा एकदमै पछुतो छ । आउने दिनमा तपाईहरुलाई गुनासोको मौका दिने छैन ।’

सन् २०१३ मा साफ च्याम्पियनसिपमा सनसनीपूर्ण प्रदर्शनका कारण चर्चामा आएका विमल राष्ट्रिय टोलीका नियमित सदस्य हुन् । उनले अब आफैंले  फेरि एकपटक प्रमाणित गर्नुपर्ने राम्ररी बुझेका छन् ।

‘मैले अब पहिला भन्दा पनि बढी मेहनत गर्नुपर्नेछ । बोलेर हैन खेलेर देखाउनुपर्नेछ ,’ दुई महिनाका लागि मछिन्द्रमा आबद्ध भएका उनी भन्छन्,‘ व्यक्तिगत रुपमै म आफुले मछिन्द्रबाट खेल्न पाउनुलाई अवसरका रुपमा लिएको छु । जति अवसर छ त्यत्तिकै चुनौति पनि छ ।राष्ट्रिय टोलीमा फर्कन पनि मैले आफुलाई मैदानमा प्रमाणित गर्नुपर्ने हुन्छ । ’

विमल पछिल्लो साताबाटै मछिन्द्रमा अभ्यास गरिरहेका छन् । उनी अन्जन र सन्तोषको प्रदर्शनबाट आफु निकै मोटिभेट भएको सुनाउछन् । ‘हामी एउटै कारणले कारवाहीमा परेका हौं । हामी लगभग उस्तै मानसिक पीडाबाट गुज्रियौं,’ उनले थपे,‘पुनरागमन पछि उनीहरुले जस्तो प्रदर्शन गरे त्यसबाट म निकै उत्साहित छु । म पनि गर्न सक्छु र मैले आफुलाई त्यसरी नै तयार गर्नुपर्छ भन्ने मनमा लिएको छु ।’

विश्वकप छनोट अन्तर्गत कुवेतविरुद्ध मंसिर ३ गते भुटानमा खेल्न जानु अघिल्लो रात डिस्कोमा बिताएका कारण एन्फाले उनीहरुमाथि कारवाही गरेको थियो । कात्तिक ३० गते भुटान जान विदाईका लागि एन्फाका पुगेका यी ४ जनालाई एन्फाले कारवाही गरेपछि उनीहरु घर फर्केका थिए ।

घटनाको झन्डै एक महिनापछि मंसिर २७ गतेबाट लागु हुने गरि कारवाही गरेको थियो । पछि चारै जानले कारवाही घटाउन मंसिर ३० गते अलग अलग अपिल कमिटीलाई निवेदन दिएका थिए । अपिल कमिटिले कारवाही अवधि नघटाई कात्तिक ३० गतेबाट लागु गर्ने निर्णय गरेको थियो ।

जति राम्रो खेलाडी भएपनि गल्तिमा कसैले माफी नपाउने विमलले यो पछिल्लो घटनामा सिकेको पाठ हो । ‘जसलाई बढी माया गरिन्छ उसले चित्त दुःखाउँदा सायद समर्थकलाई आक्रोशित बनाएको जस्तो मैले महसुस गरे । केहि समर्थकले छाडेर अधिकांशले आलोचना नै गरेको पाए,’ उनले भने,‘ सायद अपेक्षा जो सँग बढी गरिन्छ रिस पनि बढी उसै सँग उठ्छ होला । मैले त्यहि अनुभव गरेको छु । यति सबैलाई विश्वास दिलाउन चाहन्छु । विमलले यो घटनालाई पाठको रुपमा लिएको छ र परिपक्व भएर फर्कदैछ । आउने दिनमा मेरो व्यवहारले त्यसलाई पुष्टि गर्नेछु ।’