धरान (हाम्रो खेलकुद)– एकै दिन दुई वटा नकआउट फुटबल प्रतियोगिताको महत्वपूर्ण खेलमा प्रतिस्पर्धा गरिरहेको नेपाल पुलिस क्लबले मिश्रित नतिजा निकालेको छ ।

सर्वाधिक पुरस्कार राशीको नेपाल आइस चौथो सुदूरपश्चिम खप्तड गोल्ड कपमा अर्को विभागिय टोली नेपाल एपिफएफ क्लबसँग निराश भएको पुलिस त्यसैदिन धरानमा भने ए डिभिजन लिग च्याम्पियन सानमिगल मछिन्द्र क्लबलाई सडन डेथमा स्तब्ध पार्न सफल भएको छ ।

फागुन ३ गते लिग जितेर पूर्व यात्रामा निस्केको मछिन्द्रले आइतबार मात्र सताक्षी गोल्डकपको उपाधि जितेको थियो । त्यसको चार दिनपछि धरान रंगशालामा टोली पुलिस क्लबसँग सडन डेथमा निराश भएको छ । पुलिस ५–४ ले विजयी हुँदै उपाधि नजिक पुगेको छ ।

सडन डेथमा कपिल ढकालको गोल निर्णायक बनेको थियो । त्यसमा मछिन्द्रका विराज महर्जन गोल गर्नबाट चुकेका थिए । टाइब्रेकरमा पुलिसका लागि भोला सिलवाल, जुमानु राई, पदम भद्रा, तीर्थ राना मगरले गोल गरे । सुमन सुवेदी गोल गर्नबाट चुकेको थिए ।

टाइब्रेकरमा मछिन्द्रका देवेन्द्र तामाङ, रञ्जित धिमाल, विमल घर्तीमगर, विजय धिमालले गोल गरे । विशाल राई भने गोल गर्नबाट चुकेका थिए ।

शनिबार हुने फाइनलमा पुलिसले नेपाल आयल निगम मनाङ मस्र्याङ क्लबको सामना गर्नेछ । पुलिस बुढासुब्बाको सबै भन्दा बढी ५ पटक उपाधि जित्ने टोली पनि हो । निर्धारित ९० मिनेटको समय गोलरहित बराबरीमा टुंगिएपछि टाइब्रेकरमा पुलिसले बाजी मारेको हो ।

उता धनगढीमा भने साविक विजेता समेत रहेको पुलिस टोली एपिएफसँग टाइब्रेकरमै ४–३ ले निराश भएको थियो ।