काठमाडौं (हाम्रो खेलकुद) – झम्सीखेल युथ क्लब र नयाँ बस्ती युथ क्लब राजधानीमा जारी सहिद स्मारक ‘बी’ डिभिजन लिगमा विजयी भएका छन् ।

सातदोबाटोस्थित एन्फा कम्प्लेक्सको खेल मैदानमा बुधबार भएको लिगको चौथो राउन्डको खेलमा झम्सीखेलले श्री कुमारी क्लबलाई तथा नयाँ बस्तीले श्री भगवती क्लब टोखालाई पराजित गरेको हो ।

झम्सीखेलको जितमा भुवन राई र मदन स्याङ्तानले गोल गरे । दुवै गोल दोस्रो हाफमा सम्भव भएको थियो । प्रतिस्पर्धात्मक पहिलो हाफ गोलरहित बराबरीमा सकिएपनि झम्सीखेलले दोस्रो हाफमा श्री कुमारीलाई दवावमा राख्दै गोल गर्न सफल भएको थियो । ७१औं मिनेटमा भुवन राईले गोल गर्दै झम्सीखेललाई अग्रता दिलए ।

इन्ज्युरी समयको थप गरिएको चौथो मिनेटमा मदन स्याङ्तानले गोल गर्दै झम्सीखेललाई जित दिलाए ।  जितसँगै झम्सीखेलले ४ अंक जोडेको छ । पराजित श्री कुमारीको ४ खेलबाट ३ अंक छ ।

अर्काे खेलमा नयाँ बस्तीले टोखा भगवतीमाथि २–१ को जित निकाल्यो । नयाँ बस्तीको जितमा सच्चु गुरुङ र सन्जोक राईले गोल गरे । टोखाका लक्ष्मण जिसीले एक गोल फर्काए ।  खेलको ३०औं मिनेटमा सच्चु गुरुङको गोलबाट नयाँ बस्तीले अग्रता बनाएको थियो ।

६६औं मिनेटमा वैकल्पिक खेलाडी सन्जोक राईले गोल गर्दै नयाँ बस्तीको अग्रता दोब्बर पारे । सन्जोक ४१औं मिनेटमा साजन राईको स्थानमा मैदान प्रवेश गरेका थिए । ८४औं मिनेटमा लक्ष्मण जिसीले गोल गरेपनि टोखाको हार टरेन ।