एजेन्सी – इटालियन क्लब युभेन्टसका डिफेन्डर ड्यानीएल रुगानीलाई कोरोना संक्रमण भएको पुष्टि भएको छ । युभेन्टसले बुधबार एक विज्ञप्ति जारी गर्दै रुगानीलाई कोरोना भएको बताएको छ ।

२५ वर्षीय रुगानीमा हाल कुनै समस्या नदेखिएपनि परिक्षणमा भने उनलाई कोरोना भएको देखिएको हो । रुगानीले गत साता इन्टर मिलानविरुद्ध खेलमा बेन्चमा रहेका थिए । उनले उक्त खेलपछि ड्रेसिङ रुममा खुसियाली मनाइरहेको तस्बिरसमेत सार्वजनिक गरेका थिए । क्लबले अब उनले पछिल्लो समय भेटघाट गरेका सम्पूर्णलाई परिक्षण गरेर आइसोलेसनमा राख्न प्रक्रिया अगाडी बढाएको छ ।

युभेन्टसले कोरोना संक्रमण फैलिन नदिन अब आफ्ना सबै खेलाडी र प्रशिक्षकलाई क्वारानटाइनमा राख्नेछ । यससँगै अर्को साता हुने च्याम्पियन्स लिगको लियोनविरुद्ध खेल पनि नहुने लगभग पक्का भएको छ । यता युरोपा लिगमा पनि एएस रोमा र सेभिलाबीचको खेल नहुने भएको छ । कोरोनाका कारण इटालीबाट स्पेन जान रोक लगाएपछि खेल नहुने भएको हो । गेटाफे र इन्टर मिलानमा पनि सोहि कारण खेल नहुने भएको छ ।

इटालीको सरकारले एक महिनाका लागि कुनै किसिमको खेल गतिविधि संचालन नगर्न आव्हान गरिसकेको छ । इटालीमा हालसम्म १० हजार बढी संक्रमण भेटिएकोमा ८ सय भन्दा बढीले ज्यान गुमाएका छन् ।